Елордада көрнекті мемлекет және қоғам қайраткері, ағартушы, публицист Смағұл Сәдуақасұлының туғанына 125 жыл толуына арналған «Смағұл Сәдуақасұлы және заманауи білім беру құндылықтары» атты халықаралық ғылыми-тәжірибелік конференция өтті.
Оқу-ағарту министрлігі, Астана қаласының Білім басқармасы, қалалық Әдістемелік орталығы ұйымдастырған іс-шараның мақсаты – заманауи білім берудегі басқарудың жаңа модельдері мен өзекті мәселелерін талқылау, Смағұл Сәдуақасұлының еңбектеріндегі Алаш ұлттық идеясын насихаттау, жүйелі зерттеулер тиімділігін оқу үдерісінде қолдану, «Адал азамат» біртұтас тәрбие бағдарламасы мен рухани және мәдени тұтастық идеясын ашу болды.
Жиынға отандық және шетелдік ғалымдар, жоғары оқу орындарының оқытушы-профессорлар құрамы, орта білім беру ұйымдарының басшылары мен орынбасарлары, тарих пәні мұғалімдері мен жас ғалымдар қатысты. Олардың арасында елімізбен қатар Түркия, Ресей, Моңғолия, Қырғыз Республикасынан келген ғалымдар болды. Атап айтқанда, ҰҒА академигі, Ұлттық құрылтай мүшесі, «Қазақ газеттері» ЖШС бас директоры Дихан Қамзабекұлы, белгілі ғалым, қоғам қайраткері, Саяси қуғын-сүргін құрбандарын толық ақтау жөніндегі мемлекеттік комиссияның жобалық кеңсесінің басшысы Сабыр Қасымов, тарихшы Саят Баймұратұлы салиқалы әңгіме қозғады.
Конференция барысында ғылыми жиын өткен Смағұл Сәдуақасұлы атындағы №78 мектеп-гимназияның алдында Алаш қайраткерінің кеуде мүсінін ашу салтанаты ұйымдастырылды. Жиында «Смағұл Сәдуақасұлының қоғамдық-саяси қызметі және Алаш ұлттық идеясы», «С.Сәдуақасұлы мұрасы және заманауи білім берудегі басқарудың жаңа модельдері», «Алаш қайраткерлері еңбегі және қазіргі орта білім беру мәселелері», «Адал азамат» біртұтас тәрбие бағдарламасы және Смағұл Сәдуақасұлы еңбектеріндегі рухани-мәдени тұтастық идеясы», «Смағұлтану» зерттеу еңбектерін білім беру үдерісінде интеграциялау: ЖИ мүмкіндіктері» бағыттарында пікірлер айтылды. Смағұл Сәдуақасұлының ағартушылық идеяларының қазіргі білім беру жүйесімен үндестігі талқыланып, ұлттық құндылықтарға негізделген білім берудің өзекті бағыттары ұсынылды. Қатысушылар заманауи мектепте ұлттық-рухани құндылықтарды оқыту әдістері, цифрлық білім беру мүмкіндіктері және педагогтердің кәсіби дайындығын күшейту жолдары жөнінде тәжірибе алмасты.
Аманғали ҚАЛЖАНОВ
