Бүгін Астана қаласы коммуникациялар қызметінде «iKOMEK109 қалалық мониторинг және жедел әрекет ету орталығының 2025 жылдың 10 айындағы жұмыс қорытындылары» тақырыбында баспасөз конференциясы өтті, деп хабарлайды astana-akshamy.kz
Қалалық мониторинг және жедел әрекет ету орталығы – iKOMEK109 2025 жылдың 10 айындағы жұмыс қорытындыларын ұсынды. Бұл туралы брифинг барысында орталық басшысының орынбасары Асылбек Темешбеков мәлімдеді.
iKOMEK109 – елордалық тұрғындар, коммуналдық қызметтер және мемлекеттік органдар арасындағы байланыс жүйесінің негізгі буыны. Байланыс орталығының басты міндеті – қала тіршілігіне қатысты тұрғындардың өтініштерін жедел қабылдау, өңдеу және олардың орындалуын қадағалау.
Орталық құрылғаннан бері – 16 миллионнан астам өтініш
Орталық жұмыс істеп бастаған сәттен бастап 16,2 млн астам өтініш қабылдап, өңдеді. Бұл iKOMEK109-дың қалалық коммуникациялар жүйесіндегі маңызды рөлін көрсетеді. Бүгінде Орталық 23 қалалық басқарманың, 6 аудандық әкімдіктің, 25 коммуналдық қызметтің, 79 лифт шаруашылығының және 1 372 көппәтерлі тұрғын үйге қызмет көрсетуші ұйымдардың жұмысын үйлестіреді.
Сонымен қатар орталық шұғыл қызметтермен және орталық мемлекеттік органдардың аумақтық бөлімшелерімен өзара әрекет етеді. Мұндай интеграция өтініштерге жедел әрекет етуге және қала жүйелерінің тұрақты жұмысын қамтамасыз етуге мүмкіндік береді. Нәтижесінде iKOMEK109 елорданың тіршілігін қамтамасыз етуге жауапты барлық қызметтерді біріктіретін орталық буынға айналды.
1,5 миллионнан астам консультация – алғашқы қоңыраудан-ақ шешілді
2025 жылдың 10 айында iKOMEK109 байланыс орталығы 1 557 708 консультацияны қабылдап, оларды алғашқы өтініш бойынша бірден жапты. Бұл сұраныстарды өңдеудің жоғары тиімділігін көрсетеді.Ең сұранысқа ие бағыттар: денсаулық сақтау – 565 604 өтініш, қоғамдық көлік – 228 811 өтініш. Едәуір сұраныс электрмен жабдықтау (120 605), қала ортасы (113 743) және бірыңғай төлем құжаты (109 091) бағыттарына да түсті.
Тұрғындар білім беру, жол инфрақұрылымы, құқықтық тәртіп және сумен жабдықтау мәселелері бойынша да белсенді жүгінді. Бұл көрсеткіштер iKOMEK109-дың халық пен қалалық қызметтер арасындағы негізгі байланыс арнасы болып қала беретінін айғақтайды.
Инциденттер саны – 19%-ға азайды
2025 жылдың 10 айында iKOMEK109 орталығында 308 428 инцидент тіркелді. Бұл өткен жылдың көрсеткішімен салыстырғанда 19%-ға аз. Инцидент – шұғыл әрекетті қажет ететін оқиға немесе жағдай туралы ақпарат қамтылған өтініш.
Ең көп тіркелген инциденттер: жол инфрақұрылымы – 33 685, қоғамдық көлік – 33 274, денсаулық сақтау – 21 964. Сондай-ақ, санитарлық тазалау, кәріз жүйесі, қатты тұрмыстық қалдықтарды шығару және құқықтық тәртіп мәселелері бойынша да көп инцидент тіркелді. Электрмен жабдықтау мен көше жарығына қатысты өтініштердің азаюы инженерлік жүйелердің тұрақты жұмыс істеп тұрғанын көрсетеді.
Асылбек Темешбековтің айтуынша, инциденттердің азаюына қалалық қызметтердің уақтылы әрекет етуі мен акиматтар, басқармалар және коммуналдық кәсіпорындар арасындағы үйлестірудің жақсаруы себеп болған.
Полиция қызметкерлерімен бірлесіп 20 мыңнан астам құқықбұзушылық анықталды
Мониторинг пен жедел әрекет ету сапасын арттыру үшін iKOMEK109 ситуациялық орталығына елорда Полиция департаментінің қызметкерлері бекітілген. Жыл басынан бері полициямен бірлесіп 20 458 құқықбұзушылық анықталды.
Ең жиі тіркелгендері: ҚР ӘҚБтК 615-бабы – 3 506 жағдай (жаяу жүргіншілер және өзге қатысушылардың жол қозғалысы ережелерін бұзуы). Сонымен қатар 440-бап – 291 жағдай, 505-бап – 409 жағдай, 204-бап – 24 жағдай тіркелген.
Стихиялық қоқыс орындарына да ерекше көңіл бөлінуде. 10 айда ірі габаритті және жүк көліктерімен заңсыз қоқыс шығару және жинаудың 656 фактісі анықталды. Бұл шаралар санитарлық жағдайды жақсартуға және қоғамдық қауіпсіздік деңгейін арттыруға мүмкіндік береді.
12 мың камера: тәулік бойы мониторинг
iKOMEK109 елорданың түрлі бөліктеріне орнатылған 12 мыңнан астам бейнабақылау камерасы арқылы тәулік бойы мониторинг жүргізеді. Жүйе жолдарды, қиылыстарды, адамдар көп жиналатын орындарды, аялдамаларды, сауда орталықтарын, вокзалдар мен діни нысандарды қамтиды.
Видеооператорлар тәулік бойы ашық люктер, қаңғыбас жануарлар, жиналмаған қар, су басу, тұрғын үй-коммуналдық шаруашылығындағы өзге де инциденттер сияқты қауіпті жағдайларды тіркейді.
Әрбір оқиға жауапты қызметтерге бірден жолданады, бұл тәуекелдерді алдын алуға және қалалық инфрақұрылымның тұрақты жұмысын қамтамасыз етуге мүмкіндік береді.
Өтініштердің 22%-ы онлайн сервистер арқылы
iKOMEK109 тұрғындардың өтінішті өздеріне ыңғайлы тәсілмен жіберуі үшін цифрлық сервистерді белсенді дамытып келеді. Қазіргі уақытта барлық өтініштердің 22%-ы онлайн арналар арқылы қабылданады.
Қолжетімді байланыс арналары: 109 қысқа нөмірі, Telegram-бот, astana.gov.kz сайты, мобильді қосымша, Facebook және Instagram парақшалары, 109@ikomekastana.kz электрондық поштасы.
Орталықтың аудиториясы кең: Instagram — 230 мың, Facebook — 7 мың, Telegram-арна — 10 мың, Telegram-бот — 104 мың, мобильді қосымша — 99 мың пайдаланушы.
«iKOMEK109 қалалық мониторинг және жедел әрекет ету орталығы» басшысының орынбасары Асылбек Темешбеков тұрғындарды фото және видео жүктеуге мүмкіндік беретін Telegram-бот пен мобильді қосымшаны жиі қолдануға шақырды. Бұл өтініштерді өңдеуді жеделдетеді және ақпараттың нақтылығын арттырады.
