Астананы күзгі-қысқы маусымға дайындау аясында жылу электр орталықтарының (ЖЭО) сенімді әрі үздіксіз жұмысын қамтамасыз ету бойынша кезең-кезеңімен жұмыстар жүргізілуде, деп хабарлайды astana-akshamy.kz
Шығу мониторингі шеңберінде Астана қаласы мәслихатының депутаттары шамамен 3200 Гкал/сағ жиынтық жылу қуатын қамтамасыз ететін барлық стратегиялық нысандарды аралап шықты.
Дәстүрлі түрде ең жоғары жүктеме 2-ЖЭО-на түседі. Ол 1979 жылдан бері жұмыс істеп келеді және оның қуаты сағатына 1955 Гкалды құрайды, бұл қалада өндірілетін жалпы жылу мен электр энергиясының шамамен жартысына тең. Негізгі жылумен қамту аймақтарына қаланың ескі бөлігі мен елорданың сол жағалауы кіреді.
1961 жылы іске қосылған 1-ЖЭО жылу ресурстарының шамамен 20 пайызын қамтамасыз етіп, «Байқоңыр» және «Сарыарқа» аудандарының бір бөлігін жылумен қамтиды.
2023 жылы пайдалануға берілген 3-ЖЭО қосымша сағатына 468 Гкал жылу қуатын қосты. Бұл «Нұра» ауданын және белсенді түрде салынып жатқан тұрғын аймақтарды энергиямен қамтамасыз етуге мүмкіндік берді.
3-ЖЭО толығымен газ отынымен жұмыс істесе, 1-ЖЭО мен 2-ЖЭО аралас жүйеде, яғни көмір мен газды қатар пайдаланады. Негізгі отын түрі ретінде ең тұрақты әрі қолжетімді энергия көзі болып табылатын Екібастұз көмірі қолданылады. Газ қазандықтарын және заманауи технологияларды қолдану ауаға шығатын зиянды қалдықтарды едәуір азайтып, қоршаған ортаға түсетін жүктемені төмендетуге мүмкіндік береді.
Энергетикалық кәсіпорындардың өкілдері жүргізілген ауқымды жөндеу және жаңғырту жұмыстары туралы баяндады, соның аясында турбиналар мен қазандықтар күрделі жаңартудан өтіп, жылу трассалары мен түтін мұржалар қайта құрылды, автоматтандырылған басқару жүйелері жетілдірілді. Барлығы 20-дан астам қазандық пен 7 турбина жөнделді. Кәсіпорын қызметкерлерінің айтуынша, қазіргі таңда жылу электр орталықтары қалыпты режимде жұмыс істеп, қалалық желілерге жылу беруді қамтамасыз етіп отыр.
Ал 3-ЖЭО әзірге резервке ауыстырылған және ауа температурасы төмендеген кезде іске қосылатын болады.
Депутаттар жылу электр орталықтарының әлеуметтік нысандарды, кәсіпорындарды және тұрғын аудандарды жылумен қамтамасыз етудегі шешуші рөлін атап өтіп, алдағы жылыту маусымына мұқият әрі сапалы дайындықтың маңыздылығын ерекше айтты.
