Жеңіс күніне орай Халық Қаһарманы Бауыржан Момышұлына арналған «МомышҰЛЫ БауырЖАН» концерт-спектакль өтті, деп хабарлайды astana-akshamy.kz
Бұл кеш Бейбітшілік және келісім сарайында Астана қаласы әкімдігі Мәдениет басқармасының ұйымдастыруымен өтті. Бағдарламада майдан әндерімен қатар, патриоттық рухты көтеретін жаңа музыкалық туындылар орындалды. Концертке еліміздің жетекші театрлары мен өнер ұжымдары қатысты.
Негізгі рөлдерді Қуандық Қыстықбаев, Бақыт Қажыбек, Асылхан Төлепов, Данияр Оразаев сынды белгілі актерлер сомдады. Сондай-ақ Айгүл Қосанова, Жанғали Жүзбаев, Бауыржан Исаев, Клара Төленбаева, Медет Салықов, Алтынай Жорабаева, Айгүл Ниязова, Гүлсім Мырзабекова, Дәурен Төлеубаев, Хамит Отарбаев, Нұрсат Алмас, Өзгеріс Шерікбай, Ұлттық әскери-патриоттық орталығының Жас сарбаз балалар өнер студиясының хоры, «Art4man» тобы өнер көрсетті.
Жобаның өзегі – қазақ халқының даңқты ұлы, батыр, әскери қолбасшы Бауыржан Момышұлының ерлігі мен өмір жолы. Биыл ресми түрде «Халық қаһарманы» атағына ие болған тарихи тұлғаның бейнесі жаңа қырынан ашылды. Концерт-спектакльдің драматургиясы батырдың аңызға айналған ерліктеріне ғана емес, сонымен қатар Ұлы Отан соғысында жеңіске жетуге үлес қосқан майдангерлер мен тыл еңбеккерлерінің тағдырына негізделген. Көрермен тарихи деректерге сүйенген тың ақпаратпен, архивтік бейнематериалдармен және соғыс жылдарындағы баспасөз жарияланымдарымен танысты.
– Біз батыр халықпыз, аруақты халықпыз. Қай жерде жүрсекте Отанымыздың туын көтеріп, болашақты тәрбилеу жолында келе жатырмыз. Бейбітшілікке бас иген халқымыз өзінің Жеңіс күнін атап өтіп жатыр. Бұл жеңіс бір күнде келген жоқ. Жеңіс үшін жанын берген Р. Қошқарбаев атамыз, Бауыржан Момышұлы атамыз әлемге қазақ елінің батырлығын дәріптеген тұлғалар. Сондықтан тұлғалар ұмытылмауы керек, — деді генерал-лейтенант, Халық Қаһарманы Бақытжан Ертаев.
Жоба заманауи технологиялар мен театр өнерінің синтезі ретінде жүзеге асырылды. Әр монолог пен музыкалық шығарма графикалық контентпен, сахналық қойылымдармен және хореографиялық көріністермен толықтырылды. Бұл концерт — тарихи жадымызды жаңғыртып, жас ұрпаққа патриоттық тәрбие беретін, өткенге тағзым ететін мәдени кеш болды.
