Елордада құрылыс қалдықтарын заңсыз төгу фактілерін анықтау және жолын кесу бойынша жүйелі жұмыс жалғасып жатыр. «Таза Қазақстан» экологиялық акциясы аясында полиция қызметкерлері құқық қорғау органдарының заңды талаптарын елемеу жағдайларын тіркеді, деп хабарлайды astana-akshamy.kz.
Мәселен, қалаға кіреберісте 39 жастағы жүргізуші басқарған HOWO SINOTRUK жүк көлігі тоқтатылды. Полиция қызметкерлерінің талаптарына бағынбай, жол қозғалысын жалғастырған. Түсіндіру жұмысы жүргізілгеніне қарамастан, жүргізуші тағы да талаптарды елемей, жолдың жүріс бөлігіне ұсақ тастарды төгіп, жол қауіпсіздігіне қауіп төндіріп, жол жабынына зиян келтірген. Сот шешімімен оған 18 тәулікке әкімшілік қамау жазасы тағайындалды.
Сонымен қатар түнгі уақытта Астрахань тас жолы маңынан тексеру кезінде екі жүк көлігі тоқтатылды. Жүргізушілер тексерістен өтуден бас тартқан. Көп ұзамай оқиға орнына олардың басшысы – «АРЕ» ЖШС-нің иесі келіп, полиция қызметкерлерінің заңды талаптарына көмектесудің орнына, әдейі жүргізушілерге тасымалданып жатқан топырақты жолдың үстіне төгу туралы нұсқау берген.
Олардың келісілген әрекеттерінің салдарынан жол инфрақұрылымына зиян келтіріліп, полиция қызметкерлеріне ашық түрде бағынбау дерегі орын алды.
Жүргізушілер жолдар мен жол құрылыстарын бүлдіргені үшін және олар басшысымен бірге полиция қызметкерлерінің заңды талаптарына бағынбағаны үшін де жауапқа тартылды.
Сот шешімімен олардың әрқайсысына 15 тәулікке әкімшілік қамау жазасы тағайындалды.
Астана қаласы Полиция департаменті полиция қызметкерлерінің заңды талаптарына бағынбау – өрескел құқық бұзушылық болып табылатынын және қатаң жауаптылық шаралары көзделгенін ескертеді. Кез келген құқық қорғау органдарының талаптарын елемеуге тосқауыл қойылады.
«Таза Қазақстан» акциясының басты мақсаты – экологиялық мәдениетті қалыптастыру, қала тазалығы мен тәртібін қамтамасыз ету, сондай-ақ азаматтардың қоршаған ортаға деген жауапкершілігін арттыру.
#ТазаКазакстан #экология #TazaChallenge
