Биыл Ұлы Отан соғысының Жеңісіне 80 жыл толып, бұл мереке елімізде кеңінен атап өтілді. Бұл жеңіске Қазақстанда жасақталған әскери құрылымдар мен елде қалған халықтың да қосқан үлесі өте зор болды.
Фашистермен соғыста Ақтөбе қаласында жасақталған 312-ші атқыштар дивизиясының даңқы шарықтап тұрды. Осы дивизияның 589-шы артиллериялық полкы сапында соғысқа кіріскен Бегалы Боярысұлы 1901 жылы Көкшетау облысының Айыртау ауданына қарасты Сарысай Наурыз ауылында дүниеге келген. Ал әскерге Солтүстік Қазақстан облысы Куйбышев аудандық әскери комиссариатынан шақырылады. Ол осы ауданның Наурыз колхозында мал шаруашылығында жұмыс істеп жүрген жерінен Отан алдындағы борышын өтеуге аттанады. Жас жауынгер өзінің қаруластарымен бірге Мәскеу қаласын қорғауға үлес қосады. Мәскеу түбіндегі шайқаста Гитлер әскерімен қиян-кескі ұрыстар болып, 312-ші дивизия сапындағы 11 мыңнан аса жауынгердің 9 жарым мыңға жуығы жер жастанады. Жоғары басшылықтың бұйрығымен дивизия тылға қайтарылып, қайта жасақталып, ұрыс даласына оралады. Осындай алапат айқастарға қатысқан Бегалы Боярстанұлы 1943 жылы жеңіл жарақат алып, госпитальға түседі. Емделіп шығысымен қайта майдан даласына оралады. Бегалы атамыз фашистермен шайқаста сан мәрте ерлік танытып, тапқырлығымен көзге түсіп, бірқатар наградалармен марапатталады. 1944 жылы 22 шілдеде «За боевые заслуги» медалімен наградталған, бұл марапат шабуылдап келе жатқан 20-ға жуық фашисті өз зеңбірегімен жер жастандырғаны үшін беріледі. Сондай-ақ осы жылы 15 қыркүйекте кеудесіне «За отвагу» медалі тағылады. Ал 1945 жылдың 28 ақпанында жау іскерімен қиян-кескі ұрыс жүргізгені үшін «Қызыл Жұлдыз» орденімен наградталады. Міне, осылайша майдангер атамыз қатардағы жауынгерге берілетін ең жоғары әскери наградалардың бәрімен марапатталған.
Соғыс аяқталғаннан кейін Бегалы Боярстанұлына «Германияны жеңгені үшін» медалі табысталды. Майдангер атамыз болған 312-ші атқыштар дивизиясы 1945 жылғы 5 мамырда Эльба өзенінің шығыс жағалауына жетеді. Осы жерде америкалық жауынгерлермен кездесіп, өңірді фашист әскерінен тазалайды. Содан 7 маусымға дейін Берлинде тұрақтайды. Осы қалада Жеңіс күнін қарсы алады.
Ұлы Отан соғысында ерлік көрсетіп, аман-есен елге оралған Бегалы атамыз зейнет жасына дейін мал шаруашылығы саласында жемісті еңбек етті. Бүгінгі таңда Жеңіс күнін жақындатуға орасан үлес қосқан майдангер атамыздың Астана қаласында тұрып жатқан ұрпағы оның ерлігін мақтан тұтады.
Жасұлан Боярисов,
майдангердің немересі
