Елордадағы Сәкен Сейфуллин музейінде Жұмысшы мамандықтар жылы аясында «Ер дәулеті – еңбек» атты фотокөрме қойылды.
Көрме көрерменге музей қызметінің көп қырлы табиғатын танытып қана қоймай, осы салада ұзақ жыл адал еңбек еткен жандардың үлгілі жолын жастарға өнеге етуді мақсат етті. Соның ішінде ұлт руханияты мен мәдени мұрасын сақтау жолында қажырлы еңбек еткен музей қызметкерлерінің еңбегін құрметтеуге арналды. Олардың қатарында Молдахмет Досаев, Роза Асылбекова, Күлбағила Бейсекеева, Несіпбек Айтұлы бар.
Мәселен, Сәкен Сейфуллин музейінің тұңғыш директоры Роза Асылбекова руханият ордасының ашылған күнінен бастап қатарынан 14 жыл басқарды. Ақын мұрасын суығына тоңып, ыстығына күйіп қызғыштай қорғады. Музей жұмысының қарқынды жүруіне ерекше үлес қосты.
Көрнекті ақын, Мемлекеттік сыйлықтың лауреаты Несіпбек Айтұлы да аталмыш музейді көп жыл басқарды. Қайтыс боларынан аз уақыт бұрын ғана қызметінен босап, мәдени ошақтың дамуына мол еңбек сіңірді.
