Биыл Құрбан айт мейрамы 27 мамырда басталады. Осыған орай Қазақстан мұсылмандары діни басқармасы құрбан шалу рәсімін қашықтан өткізуге арналған qurban.muftyat.kz сайтын іске қосты.
Сонымен қатар еліміздің өңірлері бойынша айт намазының уақыт кестесі жарияланды. Астана қаласында айт намазы 27 мамыр күні сағат 6:00-де оқылады. Елордада өткен баспасөз мәслихатында Бас мүфти Наурызбай қажы Тағанұлы Құрбан айт мерекесіне байланысты кәсіпкерлерге үндеу жасады.
«Құрбан айт – рухани мейрам. Осы орайда еліміздегі барша кәсіпкер азаматтарды Құрбан айтта мал құнын қолдан көтермей, халықтың әлеуметтік жағдайын ескеріп, оңтайлы баға ұсынуға, жұртымыз күнде тұтынатын азық-түлікке мүмкіндігінше жеңілдік жасауға үндеймін» деп атап өтті Наурызбай қажы Тағанұлы.
