- Әр ана өз баласының ойын, денсаулығын өте жақсы сезеді, сондықтан ішкі дауысыңызды тыңдаңыз. Балаңыздың дамуына, денсаулығына күдіктендіңіз бе, тексертіп алыңыз, көңіліңіз орнында болады.
- Егер балаңыз жасына сай дамымай жатса, еңбектемесе, отырмаса, жүре алмаса, сөйлемей, тілі кеш шығып жатса – «біз де осылай кеш дамығанбыз, әкесінің тілі кеш шыққан» деп уақыт созып жүрмеңіз. Міндетті түрде дәрігер кеңесін алыңыз.
- Баланың алғаш тамақтануын дұрыс бастаңыз. Есіңізде болсын, баланың тамаққа қызығушылығын қалай оятсаңыз – солай жалғасады.
- Балаңызға мүмкіндігінше дүкен сөрелерінде тұратын зиян тәттілерді, нан өнімдері мен тетрапакеттегі сүт өнімдерін бермеуге тырысыңыз.
- Балаңыздың дене қызуы көтерілсе бірден дәрі бермей, алдымен жылы су, С витаминін беріңіз. Өз бетіңізше антибиотик тықпалаудың мүлдем қажеті жоқ.
- Көп ауру ішектен басталады. Сондықтан баланың нәжісін (үлкен дәретін) бақылап жүріңіз. Нәжіске қарап-ақ асқазан-ішек жағдайын білуге болады.
- Жылына 2 рет балаңызды талдаулардан өткізіп тұрыңыз. Жалпы қан талдауы, жалпы кіші дәрет талдауы, құрсақ қуысының ультрадыбыстық зерттеуі. Бұларды емханадан тегін тапсыруға да болады.
- Жасына сай балаңызды профилактикалық қаралуларға апаруды ұмытпаңыз. Профилактика әрдайым асқынған ауруды емдеуден жақсы.
- Балаға кез келген БАД, витамин беруге қарсымын. Дәрігер кеңесімен жақсысын таңдап барып берген дұрыс.
- Ең бастысы, сіз балаңыз үшін ең жақсы анасыз! Балаңыз үшін уайымдау, алаңдау жақсы ғой, бірақ тым мазасыз болмауға, өзіңізді кінәламауға кеңес беремін. Бала бәрін сезеді.
Әйгерім БАТЫРБЕКҚЫЗЫ,
педиатр-дәрігер
