Астана кәсіпкерлері TEI Trade Export Innovation Forum 2026 халықаралық форумына қатысуға шақырылды, деп хабарлайды astana-akshamy.kz
Астана қаласының Кәсіпкерлер палатасында Әзербайжан Республикасы делегациясының өкілдерімен кездесу өтті. Іс-шара барысында екі елдің кәсіпкерлік қауымдастықтары арасындағы іскерлік байланыстарды кеңейту және сауда-экономикалық ынтымақтастықты дамыту перспективалары талқыланды.
Кездесу барысында Астана қаласы Кәсіпкерлер палатасының директоры Қанат Әлин Палатаның негізгі қызмет бағыттарымен таныстырып, салалық кеңестердің жұмысы, сондай-ақ кәсіпкерлердің құқықтары мен заңды мүдделерін қорғауға бағытталған қолданыстағы тетіктер туралы ақпарат берді.
Тараптар халықаралық ынтымақтастықты дамыту, Қазақстан мен Әзербайжанның бизнес-қоғамдастықтары арасындағы әріптестікті нығайту және кәсіпкерлердің сыртқы нарықтарға шығуына қолайлы жағдай жасау мәселелеріне ерекше назар аударды.
Кездесудің маңызды нәтижелерінің бірі ретінде қазақстандық кәсіпкерлерді 2026 жылы Әзербайжанда өтетін TEI Trade Export Innovation Forum халықаралық форумына қатыстыру мәселесі қарастырылды.
TEI Trade Export Innovation Forum — түрлі мемлекеттердің бизнес өкілдерін, экспорттаушыларды, инвесторларды, стартап-жобаларды және салалық сарапшыларды біріктіретін халықаралық алаң. Форумның негізгі мақсаты – сауда мен экспортты дамыту, инновациялық шешімдерді ілгерілету, халықаралық әріптестікті кеңейту және іскерлік байланыстарды нығайту.
Әзербайжан делегациясының өкілдері форум аясында панельдік пікірталастар, тәжірибелік сессиялар, инвестициялық және экспорттық жобалардың таныстырылымдары, сондай-ақ жаңа серіктестерді іздеуге және өзара тиімді ынтымақтастықты дамытуға бағытталған B2B және B2G форматындағы кездесулер ұйымдастырылатынын атап өтті.
Мұндай халықаралық алаңдар кәсіпкерлерге жаңа нарықтарға шығуға, инвестициялық мүмкіндіктерді зерделеуге, тәжірибе алмасуға және шетелдік серіктестермен тікелей іскерлік байланыс орнатуға жол ашады.
Іс-шара қорытындысы бойынша тараптар екі ел арасындағы экономикалық әріптестікті одан әрі дамытуға, іскерлік байланыстарды кеңейтуге және өзара тиімді ынтымақтастықты нығайтуға мүдделі екендіктерін білдірді.
