«Даму молл» сауда ойын-сауық орталығында Сарайшық ауданы Белсенді ұзақ өмір сүру орталығының қолөнершілерінің көрмесі өтті. Іс-шарада орталыққа келушілер зейнеткер әжелердің қолынан шыққан ұлттық нақыштағы түрлі бұйымдармен танысты.
Сарайшық ауданы Белсенді ұзақ өмір сүру орталығында ұлттық қолөнерді дамытуға бағытталған қолөнер үйірмесі табысты жұмыс жасап келеді. Үйірме өз жұмысын 2025 жылдың қыркүйек айында бастаған. Алғашқы уақытта үйірмеге 20-30 зейнеткер әйел қатысса, қазіргі таңда қатысушылар саны 80 адамға жеткен. Соның ішінде шамамен 70 пайызы қолөнер жұмыстарын толық меңгеріп, белсенді түрде айналысуда.
Үйірме барысында қатысушылар, ең алдымен, инемен шұқып кесте тігу техникасын меңгерді. Бұл – дәстүрлі кілем өнерінің жаңартылған түрі. Осы әдіс арқылы шебер әжелер кілемге ұқсас әсем картиналар жасауды үйренген. Бір картинаны жасауға шамамен 2-3 күн уақыт кетеді. Кейін үйірме мүшелері жүнмен жұмыс жасау тәсілдерін меңгеріп, картиналарды табиғи жүнмен безендіру жұмыстарын қолға алған. Сонымен қатар қолөнершілер тоқылған сөмкелер, жастықтар және басқа да тұрмыстық бұйымдар дайындайды.
