Астана қаласы әкімдігінің «Наз» мемлекеттік би театры Әлемдік және дәстүрлі діндер лидерлерінің VIII съезінің аясында «Салт-дәстүрім – саф мұрам» концерт бағдарламасымен жаңа маусым шымылдығын ашты.
Өнер кешінің басты мақсаты – халқымыздың дүниетанымын, салт-дәстүрін, әдет-ғұрпын, наным-сенімін би тілі арқылы насихаттау және мәдениетіміздің бай мұрасын кеңінен таныту. Концертте халқымыздың философиясын бейнелейтін ұлттық билер, әлем халықтарының билері бір-бірімен сабақтаса отырып, мазмұнды кештің ажарын ашты.
– Концерт ақ батамен басталып, шашу шашылып, асық ойнап, беташар жасап, келін түсірген қойылым халқымыздың бай салт-дәстүрін паш етті. Сондай-ақ әзіл-қалжыңға толы «Богатая невеста», «Пироги» билері біздің көңілімізді көтеріп, қуаныш сыйлады. Театр әншілері Бауыржан Нұрымбетовтің «Жеңеше-ай», Айсұлтан Басығараның «Қара жорға» әнін өте жоғары деңгейде орындап шықты. Ал Батима Изенаева орындаған «Дударай» әні қос ғашықтың оқиғасын көз алдымызға әкелді, – дейді астаналық көрермен.
Шын мәнінде, «Наз» театрының шығармашылық ұжымы ұлттық мәдениетіміздің байлығын насихаттап қана қоймай, түрлі халықтың биі арқылы достық пен ынтымақты дәріптеуде. Театр ғимараты қаладан алыста болса да, шын тілеулес көрермендердің залды лық толтыруы – өнерге деген құрметтің айқын көрінісі.
