Астанада полиция департаментінің ұйымдастыруымен «Бақытты отбасы – бақытты ел» атты кең көлемді республикалық акция өз бастауын алды. Акцияның басты мақсаты – отбасылық-тұрмыстық зорлық-зомбылықтың алдын алу, отбасы институтын нығайту, әйелдер мен балалардың құқықтарын қорғау, сондай-ақ отбасылық құндылықтарды насихаттау, деп хабарлайды astana-akshamy.kz.
Акция аясында флешмобтар, тақырыптық кездесулер, жадынамалар мен буклеттер тарату арқылы түсіндіру жұмысы, сондай-ақ зорлық-зомбылық фактілеріне тап болған жағдайда әрекет ету алгоритмін түсіндіретін әлеуметтік материалдар жариялау сияқты іс-шаралар өткізіледі.
Бұл шараларға мемлекеттік органдардың өкілдері, үкіметтік емес ұйымдар, жастар бірлестіктері, бұқаралық ақпарат құралдары тартылуда. Бағдарламаның маңызды бөлігі – полиция қызметкерлерімен, ішкі істер органдары ардагерлерімен және олардың отбасыларымен кездесулер. Бұған қоса, дін өкілдерімен, Ақсақалдар кеңесімен және сарапшылар қауымдастығымен бірлесіп, әкімшілік қамауда отырған азаматтармен профилактикалық жұмыстар жүргізілуде.
Тұрмыстық зорлық-зомбылықтың алдын алу – полиция жұмысының басым бағыттарының бірі. Негізгі назар – әйелдер мен балалардың құқықтарын қорғауға, қазақстандық отбасылардың қауіпсіздігін қамтамасыз етуге аударылған.
Елорда полициясы тұрғындарды акция іс-шараларына белсенді қатысуға, тұрмыстық зорлық-зомбылық проблемасына бей-жай қарамауға шақырады. Қауіп-қатер немесе зорлық-зомбылық фактілері туындаған жағдайда бірден 102 нөміріне қоңырау шалуды сұрайды. Сондай-ақ азаматтардың құқықтық сауаттылығын арттыру мақсатында «111» бірыңғай байланыс орталығы мен дағдарыс орталықтарының «жедел желілері» жұмысын жалғастыруда.
