Елордадағы М.Горький атындағы Мемлекеттік академиялық орыс драма театрында «Қазақстан Республикасының жаңа Конституциясының мәні мен маңызы» тақырыбында кездесу өтті, деп хабарлайды astana-akshamy.kz.
Талқылауға театрдың әртістері мен қызметкерлері қатысты. Кездесу барысында Қазақстан Республикасының Конституциясындағы негізгі ережелер мен олардың қоғам мен мемлекеттің одан әрі дамуы үшін маңызы жан-жақты қарастырылды.
Құқық саласының маманы Тағат Нарынбаев Конституцияның негізгі қағидаттарына түсіндірме беріп, құжаттағы концептуалдық өзгерістерге кеңінен тоқталды. Атап айтқанда, ол адам құқықтары мен бостандықтарының басымдығын күшейтуге бағытталған құқық қорғау тетіктерін нығайту, мемлекеттік институттардың қызметін заманауи талаптарға сай жетілдіру, билік тармақтары арасындағы өкілеттіктерді қайта бөлу және өкілді органдардың рөлін арттыру мәселелерін атап өтті.
Сонымен қатар ол тұрақты даму үшін негізгі бағдар ретінде әділеттілік, әлеуметтік жауапкершілік және заң үстемдігі қағидаттарына ерекше мән берілетінін айтты.
Кездесу барысында қатысушылар Қазақстан Конституциясы мемлекеттік жүйенің негізі екенін, ол қоғам дамуының стратегиялық бағытын айқындайтынын және азаматтардың құқықтары мен міндеттері арасындағы тепе-теңдікті қамтамасыз ететінін атап өтті.
Қазақстанның еңбек сіңірген әртісі Бекболат Парманов өз пікірін білдіріп, бүгінгі талқылаудың театр ұжымы үшін өзекті болғанын айтты.
Оның сөзінше, қазіргі заман тез өзгеріп жатқан және кейде болжап болмайтын жағдайда конституциялық реформалар объективті қажеттілік болып саналады.
«Жаңа Конституция мемлекетке уақыт талабына сай тиімді әрекет етуге мүмкіндік беретін тұрақты құқықтық негіз қалыптастырады, сонымен бірге тұрақтылықты сақтайды.
Шығармашылық қауым үшін ең маңыздысы – конституциялық өзгерістердің орталығында адам, оның құқықтары мен әділеттілік қағидаты тұруы. Бұл болашаққа деген сенімді нығайтып, заңның қоғам мен мәдениеттің дамуын қамтамасыз етудегі рөлін айқындайды», – деді Қазақстанның еңбек сіңірген әртісі Бекболат Парманов.
