Е.Рахмадиев атындағы Мемлекеттік академиялық филармонияның концерт залында өнер ұжымының симфониялық оркестрі (көркемдік жетекшісі – Қазақстанның еңбек сіңірген қайраткері Абзал Мұхитдин, бас дирижері – «Дарын» мемлекеттік жастар сыйлығының иегері Қалқаман Дүйсембаев) «Симфониялық телепортациялар. Вена» атты концерт ұсынды.
Концерт бағдарламасында В.А.Моцарттың «Фигароның үйленуі» және «Дон Жуан» операларынан речитативтер мен ариялар, Иоганн Штраус, Йозеф Штраус, Йозеф Ланнер, Карл Михаэль Цирер сынды композиторлардың туындылары, И.Штраустың «Жарқанат» опереттасынан Аделинің ариялары, Франц фон Зуппенің «Тамаша Галатея» опереттасының увертюрасы, Ф.Шуберттің №5 симфониясы жапон дирижері Коки Гонгуй Янгтың жетекшілігімен орындалды. Қазақстан мен Татарстанның халық әртісі, Мемлекеттік сыйлықтың лауреаты Нұржамал Үсенбаева, Қазақстанның еңбек сіңірген қайраткерлері Азамат Жылтыргөзов пен Бибігүл Жанұзақ, халықаралық және республикалық байқаулардың лауреаты, «Дарын» мемлекеттік жастар сыйлығының иегері Алтынбек Әбілда, халықаралық байқаулардың лауреаттары Фируза Рахметова мен Эльмира Шпекпаева өнер көрсетті.
Аманғали ҚАЛЖАНОВ
