Дүниежүзілік денсаулық сақтау ұйымы «Иммундық патруль» атты білім беру ойынын іске қосты, деп хабарлайды astana-akshamy.kz
Осы арқылы әлемнің түкпір-түкпіріндегі оқушыларға вирустардың, иммунитеттің және вакцинацияның қалай жұмыс істейтіні түсіндіріледі. Платформа қазақ тіліне де аударылған. Астанада №113 жайлы мектептің 8-сынып оқушылары өздерін сынап көрді.
Алдымен оқушыларға вирустардың не екені және олардың қалай таралатыны түсіндірілді, кейін цифрлық платформа көрсетіліп, сынып тәжірибелік бөлімге өтті.
«Иммундық патруль» бағдарламасында оқу материалы ойын симуляциясына енгізілген. Оқушылар шағын топтарға бөлініп, компьютерлерде жұмыс істей бастады. Экранда инфекциялардың ағзаға енуі моделденеді, ал қатысушылардың міндеті – иммундық жүйенің қалай әрекет ететінін және қандай механизмдер іске қосылатынын түсіну.
Оқу барысында балалар нақты элементтерді меңгереді. Мәселен, дендриттік жасушалардың қалай әрекет ететіні, Т- және В-лимфоциттердің айырмашылығы, антиденелердің қалай түзілетіні және фагоциттердің қандай рөл атқаратыны қарастырылады. Бұл процестердің барлығы шешім қабылдауды талап ететін сценарийдің бір бөлігіне айналады және оның нәтижесі бірден көрінеді.
Сюжеттік құрылым «академия» форматында жасалған, онда оқушылар инфекциялармен күресу үшін дайындықтан өтеді. Әр модуль қысқаша кіріспеден, сыныптағы талқылаудан және практикалық тапсырмадан тұрады.
Мұндай формат теорияны тыңдап қана қоймай, оны бірден тәжірибеде тексеруге мүмкіндік береді.
Бағдарлама сонымен қатар вакцинация, ұжымдық иммунитет, аурулардың таралуы және вакциналарды әзірлеу сияқты кең ауқымды тақырыптарды қамтиды. Ақпаратты сыни бағалауға да ерекше көңіл бөлінеді – оның ішінде шынайы деректерді бұрмаланған немесе жалған ақпараттан ажырату мәселесі қарастырылады.
«Иммундық патруль» Дания, Франция, Армения, Молдова, Түркия және Еуропаның басқа да елдерінде сәтті енгізіліп, балалардың денсаулық сауаттылығын арттыруда айтарлықтай нәтиже көрсеткен.
«Бұрын вирустардың не екенін және олардың қалай әсер ететінін толық түсінбейтінмін, ал мұнда бәрі нақты процесс арқылы көрсетілгендіктен, әлдеқайда түсінікті болды», – деді Әділет есімді 8-сынып оқушысы.
Оқушылардың айтуынша, бұл формат қызықты ғана емес, сонымен қатар пайдалы болған.
«Иммунитеттің қалай жұмыс істейтінін және оны не үшін қолдау керектігін түсіндік. Енді екпенің не үшін қажет екенін және оның ағзаны қалай қорғайтынын білеміз», – дейді олар.
