Елордада Астана қаласы Полиция департаментінің бастамасымен кәмелетке толмағандардың құқықтарын қорғау жүйесін нығайтуға және құқық бұзушылықтардың алдын алуға бағытталған «Заң мен тәртіп – қауіпсіз балалық шақ кепілі» форумы өтті, деп хабарлайды astana-akshamy.kz.
Іс-шараға полиция қызметкерлері, Бала құқықтары жөніндегі уәкіл Әсима Бимендина, Астана қаласының Балалардың құқықтарын қорғау басқармасының басшысы Серік Әділбаев, мәслихат депутаттары, педагогтер, салалық мемлекеттік және медициналық мекемелердің қызметкерлері, психологиялық қызметтер, қоғамдық ұйымдар мен ата-аналар қауымдастығы қатысты.
Форумның негізгі мақсаты – балалардың қауіпсіздігін қамтамасыз ету және қолайлы әлеуметтік ортаны қалыптастыру бойынша кешенді әрі тиімді шараларды әзірлеу болды. Форум барысында қатысушылар профилактиканың негізгі бағыттарын талқылады. Олардың қатарында жасөспірімдер қылмысының алдын алу, балалардың цифрлық кеңістіктегі қауіпсіздігін қамтамасыз ету, психологиялық қолдауды дамыту, сондай-ақ өскелең ұрпақты тәрбиелеудегі отбасының рөлін күшейту мәселелері бар.
Сонымен қатар, жасөспірімдер арасында құқықтық мәдениетті қалыптастыруға ерекше назар аударылды. Іс-шара аясында «Құқықтық көмекші» чат-боты таныстырылды – бұл жастардың құқықтық сауаттылығын арттыруға және қажетті ақпаратқа ыңғайлы форматта қол жеткізуге мүмкіндік беретін заманауи цифрлық құрал.
Форум қорытындысында қатысушылар қауіпсіз балалық шақты қамтамасыз ету – мемлекеттік саясаттың басым бағыты әрі қоғамның барлық институттарының ортақ жауапкершілігі екенін атап өтті. Тек бірлескен күш-жігер арқылы әрбір баланың өзін қауіпсіз сезінуіне жағдай жасауға болады.
