Елордада Мағжан Жұмабаев атындағы Халықаралық жоғары колледжде «Үздік-2024» қалалық байқауының салтанатты жабылуы өтті.
Биыл 375 қатысушы «Үздік» атағы үшін күресіп, 150-ден астам сарапшы көшбасшыларды анықтау үшін жұмыс жүргізді. Сайыс жұмысшы мамандықтар мен кәсіптерінің маңыздылығы мен беделін арттыру, кәсіптік оқытудың озық тәжірибесін насихаттау, жұмыс берушілердің назарын қаланың кәсіптік білім беру жүйесінде жұмысшы кадрларды даярлауға тарту және түлектерді жұмысқа орналастыруға жәрдемдесу, жастарды Астана қаласы экономикасының нақты секторларына тартуға бағытталды.
Ұйымдастырушылардың сөзінше, байқау биыл үшінші жыл қатарынан ұйымдастырылды. Бірақ колледж студенттері бұл жолы алғаш рет қатысуда. Былтырғы жылы қатысушылар 5 кәсіби құзыреттілік бойынша ғана сайысқа түссе, осы жылы 25 жұмысшы мамандықтар арасында бақ сынасты.
Қалалық байқау 20 күнге созылып, 10 колледжде бірқатар жұмысшы мамандықтардың көшбасшылары анықталды. Олардың ішінде құрылыс және жөндеу жұмыстары, аспаздық және кондитерлік өнімдер, мейрамхана қызметі, IT-шешімдер, шаштараз өнері, кәсіпкерлік, сондай-ақ педагогика және бала күтімі секілді салалар бар.
Байқау қорытындысы бойынша ең көп ұпай жинаған 75 қатысушы жеңімпаз атанып, алдағы уақытта WorldSkills–2025 қалалық чемпионатына қатысуға ұсынылды. Жеңімпаздар I, II, III дәрежелі дипломдармен марапатталып, үздіктерге сондай-ақ Астана қаласы әкімдігінің «Астана жастары» жастар ресурстық орталығы және колледждердің әлеуметтік серіктестері бағалы сыйлықтар табыс етті.
Индира Бержанова
