Астанадағы Махамбет Өтемісұлы атындағы Оқушылар сарайында Халықаралық әйелдер күні қарсаңында «Көктем симфониясы» атты салтанатты бал өтті, деп хабарлайды astana-akshamy.kz.
Қалалық Білім басқармасының қолдауымен өткен мерекелік жиын мектепішілік Парламент көшбасшыларының қатысуымен өткізілді. Барлығы елордалық білім беру ұйымдарының 117 көшбасшысы қатысты.
– Бұл әсем кеш бірнеше жылдан бері өткізіліп, жақсы дәстүрге айналып келеді. Ол елорданың ең белсенді, бастамашыл, жауапкершілігі жоғары, дарынды оқушылардың басын біріктіретін алаңға айналды. Кешке қадірлі қонақ ретінде ардақты аналар мен әжелерді шақырып, мерекелік көңіл-күй сыйлауды мақсат еттік, – деді М.Өтемісұлы атындағы Оқушылар сарайы директорының орынбасары Айымгүл Жабаева.
Кештің салтанатты бөлімі «Созвездие» спорттық-балдық би ансамблінің хореографиялық композициясымен ашылып, кейін халықаралық, республикалық байқаулардың лауреаты Нұрай Саинованың өз шығармашылығын паш етті. Мерекелік бағдарлама оқушылардың дәстүрлі вальсімен жалғасты. Сонымен қатар, заманауи музыкалық композициялар мен түрлі флешмобтар та қойылды. Осылайша, аналарға, педагогтерге, тәлімгерлерге арналған алғыс кеші ерекше есте қалды.
