Бала – болашақ иесі, ал оның денсаулығы – елдің аманаты. Кішкентайлардың бойына қуат беріп, ақыл-ойының дұрыс қалыптасуына себепкер – ол сапалы әрі пайдалы тағам. Осы орайда, балабақша аспазының еңбегі ерекше.
Солардың бірі – Астана қаласындағы №30 «Қайнар» балабақшасының тәжірибелі аспазы Сағат Бекмағамбетова.
– Мен осы балабақшада 35 жыл бойы еңбек етіп келемін. Осы уақыт аралығында талай баланы кішкентайынан қабылдап, олардың қалай өсіп, ержетіп, тіпті өз баласын ертіп қайта келгеніне де куә болдым. Сондықтан да бұл жерден шыққан адамдар да балалар да маған өте ыстық. Мұндағы баланың әрқайсысы мен үшін өз баламдай. Бір сөзбен айтқанда, балабақша – менің екінші үйім сияқты, – дейді Сағат Нескенқызы.
Ол Ақмола облысының Шалқар ауылында дүниеге келген. Мектепті тәмамдаған соң, 1980 жылы елордаға (ол кезде Целиноград) келіп, құрылыс-техникалық техникумға оқуға түсіпті. Алайда тағдыр оны тағам дайындау ісіне алып келген.
– Аспаздыққа бірден келдім деп айта алмаймын, бірақ бала күнімнен ас үйге, тамақ әзірлеуге ерекше қызығатынмын. Сол қызығушылығым мені осы жолға әкелді. 1990 жылы №30 «Қайнар» балабақшасына жұмысқа орналастым. Сол күннен бері осы ұжыммен біргемін. Жылдар өте балалардың да, әріптестердің де ауысқанын көрдім, бірақ ұжымның бірлігі мен жылуы өзгерген жоқ. Әрі мен де жұмыс ауыстырмай тұрақты түрде істеп келемін, – дейді кейіпкеріміз.
Жастайынан еңбекпен өскен Сағат Нескенқызы бүгінде зейнет жасында болса да, сүйікті ісін тастамаған.
– Жұмысым өзіме ұнайды. Таңертең балабақша есігін ашып, кішкентайлардың мәз-мейрам күлкісін естігенде бір сергіп қаламын. Балаларға таза әрі дәмді ас әзірлеу – үлкен жауапкершілік. Әр тағамның сапасына, мөлшеріне, дәрумендік құрамына дейін мән береміз. Өйткені бала денсаулығының негізі дұрыс тамақтанудан басталады. Осыны түсініп, шын ықыласпен істесең, шаршау да білінбейді, – дейді көп жылғы еңбегіне адал аспаз.
Бүгінде Сағат Нескенқызы жас әріптестеріне үлгі болып, тәжірибесімен бөлісіп келеді. Ол үшін бұл жай жұмыс емес – жүрек қалауымен таңдалған өмірлік мамандық.
Шапағат ӘБДІР
