Астанадағы саябақтарда қала тұрғындары мен қонақтары үшін тегін йога сабақтары жалғасуда. Жаттығулар 5 қазанға дейін өтеді, деп хабарлайды astana-akshamy.kz.
Йога жаттығуларын білікті мамандар, оның ішінде Үндістаннан келген қонақтар жүргізеді. Жаттығулар кешенінің мақсаты – аз қозғалатын адамдардың денсаулығын жақсарту және төзімділігін арттыру. Қала тұрғындарына арналған кілемшелер тегін беріледі.
«Сабақтар аптасына үш рет – сейсенбі, бейсенбі және сенбі күндері сағат 19:00-де өткізіледі. Жаттығулар уақыты мен орны қала тұрғындары мен қонақтары үшін ыңғайлы етіп таңдалды, әркім өзіне жақын орындағы алаңға келе алады», – деді Астана қаласы Мәдениет және спорт басқармасының баспасөз хатшысы Мадина Айтқалиева.
Жаттығулар әр түрлі жас өкілдері арасында қызығушылықпен қабылданады.
«Салқын ауа райына қарамастан, мұнда тоңбаймын. Келіп, денемді қыздырамын. Жұмысымды көбіне орындаймын, ал йога денсаулығыма өте пайдалы. Астананың барлық саябағында жаттығулардың өтуі өте ыңғайлы. Қатысқаныма бір аптадан астам уақыт өтті, жаттықтырушыға көңілім толады, бәрін екі тілде түсіндіреді», – деді астаналық Ирина Беженарь.
Ұйымдастырушылардың айтуынша, мұндай жаппай іс-шаралар тұрақты түрде өткізіледі.
«Қазіргі уақытта Мәдениет және спорт басқармасының бастамасымен Астанада спортты жаппай дамытуға бағытталған әлеуметтік жобалар жүзеге асырылуда. Біздің бастамамызбен қала саябақтарында жаттығулар ұйымдастырылды. Сонымен қатар, тұрғын үй аумақтарында біздің мамандарымыз «Aula Fit» тегін жаттығулары өткізуде, ал тұрғын үй кешендері аумағында футбол жарыстары ұйымдастырылады. Сондай-ақ, скандинавиялық жүріс жаттығулары бастамалары да қолға алынған. Яғни әркім өзіне ұнайтын сабақ таба алады», – деді Спорттық іс-шараларды өткізу дирекциясының орынбасары Ержігіт Үсербай.
Йога сабақтары келесі орындарда өтеді:
• Сарыарқа ауданы – «Йога» саябағы (Мамбетов көшесі, 1);
• Есіл ауданы – «Жетісу» саябағы;
• Нұра ауданы – Орталық саябақ;
• Алматы ауданы – Триатлон саябағы және «Жерұйық» саябағы;
• Сарайшық ауданы – Президенттік саябақ.
Қосымша ақпаратты +7 707 777 88 82 нөміріне қоңырау шалу арқылы алуға болады.
