Елорданың Байқоңыр ауданында «Таза Қазақстан» республикалық экологиялық акциясы аясында абаттандыру және қаланы көгалдандыруға бағытталған іс-шара өтті, деп хабарлайды astana-akshamy.kz Астана әкімдігінің ресми сайтына сілтеме жасап.
Іс-шара Кенесары көшесіндегі №62 және №64 үйлердің маңында ұйымдастырылды. Оған Қазақ тұтынушылар одағының Жоғары колледжінің студенттері, №16 мектептің педагогтері, «Ауыл» партиясының өкілдері және Байқоңыр ауданы әкімі аппаратының қызметкерлері қатысты.
Іс-шара барысында қатысушылар іргелес аумақты қоқыстан тазалап, ағаштардың айналасындағы топырақты ретке келтіріп, абаттандыру жұмысын жүргізді.
«Акция барысында студенттер мен педагогтер отырғызылған ағаштардың айналасындағы топырақты ретке келтіріп, қоршаған ортаның тазалығын сақтауға және қаланы абаттандыруға өз үлестерін қосты», – деді Қазақ тұтынушылар одағы Жоғары колледжі директорының тәрбие жұмысы жөніндегі орынбасары Акерке Мырзалиева.
Ол мұндай іс-шаралардың экологиялық маңызымен қатар, тәрбиелік мәні де бар екенін атап өтті.
«Мұндай акциялар – аумақты тазалаумен ғана шектелмейді. Бұл жастардың экологиялық мәдениетін, еңбекқорлығын, жауапкершілігін және туған қаласына ұқыпты қарау сезімін қалыптастыруға ықпал ететін маңызды тәрбие алаңы. Тазалық әрқайсымыздан басталады. Қоршаған ортаны таза ұстау, қоғамдық орындарға ұқыпты қарау және қаланы абаттандыруға өз үлесімізді қосу – барлығымызға ортақ міндет», – деп атап өтті Акерке Мырзалиева.
«Таза Қазақстан» аясындағы экологиялық акциялар қала тазалығы мен тәртібін сақтау, қалалық ортаны көгалдандыру және елорда тұрғындарының экологиялық мәдениетін арттыруға бағытталған.
#ТазаҚазақстан #экология #TazaChallenge @TazaQazaqstan
