Мемлекеттік кірістер органдары бизнесті қайта ұйымдастыру рәсімін пайдалануға негізделген негізсіз салықтық пайда алу схемасын тоқтатты, деп хабарлайды astana-akshamy.kz.
Астана қаласы бойынша Мемлекеттік кірістер департаменті жүргізген салықтық әкімшілендіру барысында бірқатар компаниялардың қайта ұйымдастыру рәсімін экономикалық мақсаттар үшін емес, қосылған құн салығы (ҚҚС) бойынша табысты жасанды түрде қалыптастыру мақсатында пайдаланғаны анықталды.
Аталған схемаға 13 заңды тұлға қатысқан. Анықталған бұзушылықтардың жалпы сомасы 2,1 млрд теңгені құрады.
Барлық анықталған фактілер бойынша салықтық әкімшілендіру шаралары жүргізіле отырып, мемлекеттік кірістер органдары қабылдаған шешімдердің заңдылығы сот органдарымен расталды.
Бүгінгі күні жоғары тұрған сотта (Кассациялық сот) осындай бестен астам іс қаралды. Барлық жағдайда түпкілікті сот шешімдері мемлекеттік кірістер органдарының пайдасына шығарылды. Қалыптасқан сот практикасы қайта ұйымдастыру рәсімін негізсіз салықтық пайда алу мақсатында пайдаланудың заңсыз екенін растады.
Осындай схемалардың алдын алу мақсатында Салық кодексіне өзгерістер енгізілді. Келесіде заңды тұлғаларды қайта ұйымдастыру рәсімі тек салықтық әкімшілендіруден өткеннен кейін ғана жүзеге асырылады, оның ішінде камералдық бақылау немесе заңнамада көзделген жағдайларда салықтық тексеру жүргізіледі.
Енгізілген өзгерістер қайта ұйымдастыру рәсімінің ашықтығын қамтамасыз етуге және адал салық төлеушілер үшін тең жағдайлар жасауға бағытталған.
Толығырақ ақпарат - 1414/3 нөміріне немесе @astana_mkd_dgd_astana Instagram парақшасы бойынша ала аласыз.
