Абай Құнанбайұлының туғанына 180 жыл толуына орай Астанадағы ҚР Ұлттық музейінде «Өлең – сөздің патшасы» атты жыр кеші өтті. Іс-шараға №73 мектеп-лицейінің, Абай Құнанбайұлы атындағы №87 мектеп-гимназияның және Ыбырай Алтынсарин атындағы №83 мектеп-гимназияның оқушылары мен ұстаздары қатысты.
Сондай-ақ, іс-шараға Астана халықаралық университетінің Өнер және гуманитарлық ғылымдар жоғары мектебінің деканы, ҚР Білім беру ісінің құрметті қызметкері, тарихшы Саят Ыбырай, «OYORDA» қауымдастығының вице-президенті Жансұлтан Бүркітбай, №87 мектеп-гимназияның ұстаздары Данияр Ихсан мен Нұрболат Қабен, суретші-дизайнер Мұхтар Нұрбек, халықаралық және республикалық конкурстардың лауреаты Шолпан Шарапатова, Е.Серкебаев атындағы №3 Балалар музыка мектебінің қобыз сыныбының оқытушысы Айымжан Алдабергенова, сондай-ақ «Замандас» жастар коворкингінің мүшелері мен ұстаздары қатысып, кештің маңыздылығын арттырды.
Ал, жасөспірімдер Абайдың өлеңдерін жатқа айтып, қара сөздерін мәнерлеп оқып, әннен шашу шашты. Сонымен бірге, музейдің суретші-дизайнері Мұхтар Нұрбек балаларға арналған өз кітабының тұсаукесерін жасап, көпшіліктің назарына ұсынды.
