А.Байтұрсынов атындағы созыла жатқан көшенің жан-жағы көп зәулім үй. Иә, былтыр ғана құрылған Сарайшық ауданына осы көшемен өте қалсаңыз, қаптаған құрылысқа тап боларыңыз анық. Жаңа вокзал маңайын қоршай салынып жатқан көпқабатты баспананың қарасы қалың. Сенбесеңіз, араға апта аралатып мұнда бір соғыңыз. Сонда байқарсыз. Кеше ғана іргетасы қағылған үйдің әп-сәтте биікке ұмтылғанын… Рас, Астана жылдам өсуде.
…Әудем жерде көше тазалықшылары кетіп барады. Бірі – ер, бірі – әйел адам. Жетегінде – қоқыс жәшігі. Сүйретіп келеді. Табанына мықтап бекітілген шағын қос дөңгелекті жәшік те тротуар үстінде жеңіл сырғиды.
Мен әлі оларды сырттай бақылап тұрмын. Күн де сол уақытта шақырайып тұрған. Ал қос әріптес мұндай ыстықты елең қылмағандай. Тіпті түрлерінде кірбің жоқ. Қайта тура бір ерлі-зайыптылардай қалжыңдай күлісіп, өз жұмыстарын шынайы атқарып жүр. Бәлкім, олар расымен де жай әріптес емес, бір отбасы болар… Жақындай түстім. Тілдеспекке. Айтпақшы, бұл журналистік тіршілік еді.
– Біз расымен ерлі-зайыптымыз, – деді өзін Сәбиқажы деп таныстырған жігіт ағасы. – Өзіміз Монғолия елінен ата жұртқа 1992 жылы келдік. Ал осы «Астана Тазалық» мекемесінде жұмыс істегелі 4 жылдан асты. Өзім осы Сарайшық ауданының шеберімін. Ал келіншегім – жол жұмысшысы. Менде әу баста жұмысшы болып еңбек еттім. Еңбегімнің көрінгені болар, кейін бригадир, одан соң учаске шебері қылып тағайындады. Қарамағымда 21 адам бар. Өзіңіз көргендей, жол бойының тазалығы мойнымызда. Жазда шашылған қоқыс болса, қыста қар мен тайғақтан тротуарларды тазалаймыз. Аялдама маңайы, жол жиектері мен ондағы қоқыс жәшіктерін уақытылы босатып отырамыз. Ең бастысы, қарамағымдағы қызметкерлердің қауіпсіздігіне жауаптымын.
4 бала тәрбиелеп отырған Сәбиқажы Бодаухан мен Маржангүл Тілеубайқызы қала іргесіндегі 250 түтіні бар Бұлақсай ауылында тұрады. Қала ішіндегі жұмысқа өз көлігімен қатынап жүр.
– Таңғы төрттен бастап тіршілікке енеміз. Үйден ас-суымызды ішкен соң қалаға өз көлігімізбен жетіп, сағат жетіден бастап жұмысқа кірісеміз. Жаңа аудан болғандықтан мұнда құрылыс көп. Ал ондай жерде адамдар тарапынан түрлі қалдықтың да мол болатыны анық қой. Осындағы А.Байтұрсынов, Ж.Нәжімеденов, М.Тынышпаев көшелерін тап-тұйнақтай етіп ұстау – оңай шаруа емес. Бір жақсысы – біздің компания әр маусымда тиесілі жұмыс киімі мен керекті құрал-жабдықтан тарықтырған емес. Ал жалақы жайы айтсақ, оған да көңіл тоғаяды, – дейді учаске шебері.
Ал Маржангүлдің айтуынша, қала тұрғындары арасында тазалық қызметкерлеріне деген құрмет жыл сайын артып келеді. Қазір қолындағы қоқысты ретсіз әр жерге тастайтын адамдар әлдеқайда азайған. «Оны күнделікті жұмыс барысында байқап жүрміз» дейді ол.
– Кейбір тұрғындардың тазалыққа бейжай қарағаны үшін басқаларды кінәлауға болмас. Бірақ уақыт өткен сайын адамдардың тазалық туралы түсінігі артып келеді. Өз отбасымызда да балаларды қоршаған ортаны құрметтеуді үйретіп, барынша тазалық жөнінде дұрыс ұғым беріп тәрбиеледік. Қазір үлкен ұлымыз әскерде. Оған дейін осы елордадағы жоғары оқу орнын оқи жүріп, жазғы демалысында бізбен бірге жұмыс істеді. Өзі компаниямен уақытша маусымдық келісім-шартқа отырып, еңбегіне қарай жалақысын алды. Бұл жерде ұлымыз еңбек ете отырып, маңдай термен адал нан табуды үйренсе, екіншіден, тазалыққа деген көзқарасы дұрыс жағынан қалыптасты деп ойлаймын, – деп ағынан жарылды тазалықшы келіншек.
Ерлі-зайыптылар ел Президенті Қасым-Жомарт Тоқаев «Жұмысшы мамандықтар жылын» жариялағанда қуанғандарын жасырмады.
– Расымен, елдің бәрі құрылыс не басқа де техникалық мамандықтан сырттап кетті емес пе? Мемлекет басшысының бұл идеясы – көптеген елеусіз мамандық иелеріне үлкен демеу болғандай. Қазір газет-журнал, теледидардан бөлек, әлеуметтік желіде де осы жылдың насихаты өзімізге ұнады. Бұрын еш жерде көрінбеген түрлі мамандық иелерін құрмет төріне шығару, олардың еңбегін дәріптеу дұрыс жолға қойылғандай. Енді бұл тоқтап қалмаса екен, – дейді жұмысшы отбасы.
Жалақысы жап-жақсы әрі түрлі мерекеде сыйақысы бар «Астана Тазалық» ЖШС-да істейтін ерлі-зайыптылардың осылайша қала тазалығын сақтап жүр. Әрі онысын мақтаныш та етеді.
«Кейбіреулер айтпақшы, бұл намыстанатындай жұмыс емес. Кімнің көзқарасы қалай, оны да елемейміз. Таза еңбек, адал несібе жолындамыз. Балаларға да осы жолдан таймау керегін үнемі айтамыз. Екіншіден, біз қазақпыз ғой. Осы мақсатта байырғы ата кәсіптен қол үзбей келеміз. Яғни, ауылда мал өсіріп, үйдегі балаларды да жасынан шаруаға бейімдеп жүрміз» дейді Сәбиқажы мен Маржангүл.
Ержан ҚОЖАС
