Қазақстандық оқушылар АҚШ-та робототехникадан өткен әлем чемпионатында жоғары нәтижеге қол жеткізді
29 сәуір мен 2 мамыр аралығында Хьюстон қаласында STEM саласындағы ең ірі халықаралық жарыстардың бірі — FIRST World Championship өтті. Оған әлемнің 66 елінен командалар қатысты. FIRST Tech Challenge (FTC) санатында Қазақстан атынан 12 мектеп командасы өнер көрсетті. Қатысушылар жоғары дайындық деңгейін көрсетіп, мықты қарсыластар арасында өздерін мықты ойыншы ретінде танытты, деп хабарлайды astana-akshamy.kz.
Қазақстандық командалардың бірі — елордалық РФМШ оқушылары плей-офф кезеңіне өтіп, әлемдік деңгейде бәсекеге қабілетті екенін дәлелдеді. Тағы бір команда Franklin дивизионында Reach Award (1 орын) жүлдесін иеленді. Бұл марапат STEM қауымдастығын дамытуға және инженерлік білімді насихаттауға қосқан үлесі үшін беріледі.
Қазылар алқасының бағалауынша, қатысушылар тек техникалық дағдыларымен ғана емес, сонымен қатар инженерлік бағыттарға балалар мен жасөспірімдерді тарту бойынша ауқымды жұмысымен ерекшеленді. Жыл бойы олар білім беру кездесулерін, шеберлік сабақтарын және әлеуметтік бастамаларды, оның ішінде балалар үйлері мен инклюзивті мекемелермен жұмыс жүргізді.
Сондай-ақ робототехника жобаларын қолдауға және дамытуға бағытталған цифрлық шешімдер әзірлеу ерекше назар аударуға тұрарлық. Бұл STEM-білімге қолжетімділікті кеңейтуге ықпал етеді.
Қазақстандық оқушылардың халықаралық аренадағы жетістігі жастардың ғылым мен технологияға қызығушылығының артып келе жатқанын көрсетіп, еліміздің жаһандық білім беру кеңістігіндегі орнын нығайта түседі.
