Мемлекет басшысы Қасым-Жомарт Тоқаев атап өткендей: тазалық – бұл тек экология ғана емес, әрбір азаматтың жан тазалығы, ар-ожданы.
«Таза Қазақстан» – бұл бір реттік іс-шара емес, ұлтты ортақ іске жұмылдыратын жүйелі жұмыс. Мұны мына сандар да дәлелдейді:
Жыл басынан бері елімізде 600-ден астам экологиялық іс-шара өтті. Оған 7 миллион адам қатысты. 1,3 миллион тал көшет отырғызылды. 130 мыңнан астам гектар жер тазартылды.
Мемлекет басшысы атап өткендей, «тазалық ластықтың алдында ешқашан ұтылмайды, тазалық бәрін жеңеді». Бұл – қарапайым, әрі терең мағыналы ақиқат, тек экологияға ғана емес, бір-бірімізбен қарым-қатынасымызға, әрбір мемлекеттік органның жұмысына, елдің болашағын қалай құратынымызға да қатысты.
Бүгін, 19 қыркүйекте, Мемлекет басшысының өзі жастар мен экобелсенділермен бірге Астананың Ботаникалық саябағында ағаш отырғызып, осы республикалық акцияға қатысудың жеке үлгісін көрсетті.
Біз, бірінші Құрылтай депутаттары, дәл осы күні толық құраммен, дәл сол жалпыұлттық акция аясында субботникке қатыстық – иығымыз тірескен, жүрегіміз ашық күйде. Ағаш отырғызу шарасы шынайы жылы, ынтымақты атмосферада өтіп, бәрімізді бір идея, бір іс аясында біріктірді. Отырғызылған әрбір ағаш – бұл жай ғана экологияға қосқан үлес емес, ел мен келер ұрпақ алдындағы ортақ жауапкершіліктің символы.
Алмат Жөкебаев,
Құрылтай депутаты
