Елорданың №76 лицейінің 9-сынып оқушысы Бекдияр Құдайберген өз мектебінің оқушыларын каратэден жаттықтыратын болды, деп хабарлайды astana-akshamy.kz
Бекдияр жаттығуды "Біртұтас тәрбие" бағдарламасы аясында өткізеді. Оның өзі де каратэден айтарлықтай нәтижелерге қол жеткізді: Азия чемпионатын екі рет, Қазақстан чемпионатын алты рет жеңіп алды, каратэден спорт шебері және дзюдодан спорт шеберіне үміткер. Келесі мақсат – әлем чемпионатын бағындыру.
"Мен "Біртұтас тәрбие" бағдарламасы аясында спорттағы тәжірибеммен бөліскім келеді. Ерікті ретінде мен каратэден 4 және 5-сынып оқушыларын тегін жаттықтырамын", - деді Бекдияр.
Оның негізгі мақсаты - белсенді өмір салты мен оқушылардың бос уақытын тиімді пайдалану үшін жағдай жасау. Ол үшін балалардың спортпен шұғылдануға және дене белсенділігін арттыруға мүмкіндігі болуы маңызды.
