Астана қаласы әкімдігінің музыкалық жас көрермен театрында түркі әлеміне теңдессіз мұра қалдырған Шыңғыс Айтматовтың «Қош бол, Гүлсары!» туындысы негізінде сахналанған спектакльдің тұсаукесері өтті.
Терең философиялық туынды адам тағдыры, ар-ождан, адалдық, туған жерге деген сүйіспеншілік пен рухани құндылықтар тақырыптарын қозғайды. Қойылым көрерменді өткен мен бүгінді саралап, адамдық қасиеттер мен рух тазалығы жайында ойлануға жетелейді.
– Шығармада осыдан бір ғасыр бұрынғы оқиғалар жайлы болады. Бірақ ол әлі күнге дейін өз өзектілігін жоғалтқан жоқ. Бірнеше тақырып қозғалады. Әр көрермен өзіне жақын, өзіне ыстық тақырыбын таңдап, ой түйіп кетеді деген ойдамын. Негізгі өзек – Танабайдың өмір жолы мен оның жан серігіне айналған тұлпары Гүлсарының тағдыры. Басты кейіпкерлер сомдаған көріністен адамның жастық шағы, үміті, сенімі мен өмірлік күресі астасып, бір дәуірдің келбеті ашылады. Спектакль – адам мен жануардың арасындағы терең рухани байланысты, уақыттың өткіншілігін және қоғам өзгерістерінің адам тағдырына әсерін баяндайды. Шығармашыл топ туынды түпнұсқасының рухын сақтай отырып, оның көркемдік-идеялық мазмұнын заманауи театр тілімен жеткізуді мақсат етті, – дейді қоюшы-режиссер Ералхан Мырзахмет.
Басты рөльдерді театр әртістері Есқара Қазыбек, Аймахан Ермахан, Ақниет Зәмзат, Әбдісадық Гүлдана сомдады.
