Қаржы мониторингі агенттігінің Астана қаласы бойынша Экономикалық тергеп-тексеру департаментінің қызметкерлері "Заң және тәртіп" қағидатын іске асыру аясында "ҚазТрансОйл"АҚ ұжымы үшін қаржылық және цифрлық қауіпсіздік бойынша семинар өткізді, деп хабарлайды astana-akshamy.kz
Аталған семинарға "ҚазТрансОйл" АҚ орталық аппаратының және өңірлердің еншілес бөлімшелерінің 281 қызметкері қатысты.
Іс-шараның мақсаты-халықтың қаржылық және цифрлық қауіпсіздігі мен құқықтық сауаттылығын арттыру. Кездесу барысында Астана қаласы бойынша Экономикалық тергеп-тексеру департаментінің аға жедел уәкілі Нұрғали Аязов қаржылық қауіпсіздіктің негіздерін егжей-тегжейлі түсіндірді, "жанды" кейстер мен алаяқтық схемаларға тарту тәсілдерін қарастырды. Сонымен қатар жиында алаяқтардың құрбаны болмау, қаржы пирамидасының салымшысы, дроппер болмау туралы ақпарат жеткізілді, сондай-ақ цифрлық қауіпсіздікті сақтаудың маңыздылығы, алаяқтықтан қорғау әдістері, интернет-алаяқтық, терең фейктер, дербес деректерді қорғау туралы егжей-тегжейлі айтылды.
Қатысушылар сұрақтар қойып, қаржылық қауіпсіздік бойынша практикалық кеңес алды. Семинар соңында қатысушылар Астана қаласы бойынша Экономикалық тергеп-тексеру департаментінің қызметкерлеріне осындай іс-шараларды өткізгені үшін алғыс білдірді.
