Елорда прокуратурасы ұлтаралық келісімді сақтау бағытында жүйелі жұмыс жүргізіп келеді

А А 3 сағат бұрын

Астана қаласының прокуратурасы елордадағы ұлтаралық келісім мен қоғамдық тұрақтылықты сақтау бағытында жүйелі жұмыс жүргізіп келеді. Күн сайын әлеуметтік желілерге мониторинг жүргізіліп, ұлттық араздықты тудыратын әрекеттердің алдын алу шаралары қабылдануда. Уәкілетті органдармен бірлесіп профилактикалық іс-шаралар ұйымдастырылуда, деп хабарлайды astana-akshamy.kz.

ҚР Ауыл шаруашылығы министрлігі Жер ресурстарын басқару комитетінің Астана қаласы бойынша Жер ресурстарын басқару департаментінде этносаралық қатынастар саласындағы заңнаманың және бейбіт жиналыстар туралы заңнаманың сақталуы мәселелері бойынша кезекті кездесу өтті.

Қазіргі таңда аталған салада елеулі қауіп-қатерлер анықталған жоқ. Украина, Таулы Қарабақ және Таяу Шығыстағы оқиғаларға қатысты халықаралық қақтығыстарды талқылауда пайдаланушылар белсенділігінің төмендегені, онлайн форматтағы арандатушылық пікірталастар санының азайғаны байқалады.

2026 жылдың басынан бері елордадағы ұлтаралық ахуал тұрақты және құқық қорғау органдарының бақылауында. Сонымен қатар 2025 жылы ұлттық араздықты тудыру және азаматтардың ар-намысы мен қадір-қасиетін қорлау фактілері бойынша 12 қылмыстық іс тіркелген. Биыл осыған ұқсас тағы 5 іс тіркеліп, сол бойынша тергеу әрекеттері жүргізілеуде.

ҚР ҚК-нің 174-бабы әлеуметтік, ұлттық, нәсілдік және діни алауыздықты, оның ішінде БАҚ пен интернет-платформаларды пайдалана отырып қоздыруға бағытталған қасақана іс-әрекеттер үшін жауапкершілікті көздейді. Қала прокуратурасы Ұлттық қауіпсіздік комитетімен және полиция органдарымен бірлесіп ұлтаралық қатынастар мен қоғамдық-саяси шиеленістердің шиеленісуінің ықтимал алғышарттарының алдын алу және уақтылы жолын кесу мәселелерін тұрақты бақылауда ұстайды.