Астанада, Әл-Фараби атындағы Оқушылар сарайында «AI-BALA» II медиафестивалі аясында «Жас журналистер» байқауының жеңімпаздарын марапаттау рәсімі өтті, деп хабарлайды astana-akshamy.kz.
Іс-шараны Астана қаласы әкімдігі Әл-Фараби атындағы Оқушылар сарайының медиа орталығы ұйымдастырды. Іс-шараға жетекші БАҚ өкілдері, теле және радиожурналистер, коммуникация саласының мамандары, сондай-ақ фестиваль серіктестері қатысты. Құрметті қонақтар қатарында «Вечерняя Астана» газетінің бас редакторы Лариса Увалиева, «Казахстанская правда» басылымының журналисті Әсел Мұқанова, ҚР ІІМ Есірткі қылмыстарына қарсы іс-қимыл комитеті 2-басқарма бастығының орынбасары полиция полковнигі Сергей Ильиных, ҚР ІІМ КПН аға жедел уәкілі полиция подполковнигі Дамир Байбазаров, Астана қаласы Полиция департаментінің ЕҚБ жедел уәкілі полиция капитаны Жандос Сейтенов, экономист Асемгүл Исетова, PR-маман және event-продюсер Назгүл Тәліпова болды.
Фестиваль аясында қатысушылар 11 номинация бойынша бағын сынап, 300-ден астам шығармашылық жұмыс ұсынды. Атап айтқанда, байқау мақала, сұхбат, видеосюжет, видеоролик, подкаст, фоторепортаж, ең үздік сайт макеті, ең үздік қысқа видео, ең үздік мектеп блогы және ертегі сияқты бағыттарды қамтыды. Бұл номинациялар жас журналистердің жан-жақты қабілеттерін ашуға, шығармашылық әлеуетін дамытуға және заманауи медиаформаттарды меңгеруге мүмкіндік берді.
Салтанатты марапаттау рәсімі барысында байқау жеңімпаздары мен жүлдегерлері құрметке ие болып, үздік жұмыстардың авторларына дипломдар табысталды. Байқаудың негізгі мақсаты – оқушылардың шығармашылық әлеуетін дамыту, мектеп оқушылары арасында журналистиканы насихаттау және мектеп медиаорталықтарын қолдау.
Жобаның серіктесі балалардың қауіпсіздігін қамтамасыз ететін Kid Security қосымшасы болды. Жас журналистер мен блогерлер ақпараттың үлкен көлемімен жұмыс істейтін жағдайда қауіпсіздік мәселелері ерекше өзектілікке ие болады.
«Біз ата-аналарға балаларын онлайн-қатерлер мен нақты қауіптерден қорғауға көмектесеміз, әр бала өзін қауіпсіз сезінуі үшін жағдай жасаймыз. Біздің басты мақсатымыз – балалар өздерін еркін көрсете алатын, шығармашылықпен айналысатын, қарым-қатынас жасайтын және дамитын, буллингсіз, сын мен қысымсыз, тек өздері болып, бақытты бола алатын орта құру. Осындай тамаша іс-шараны ұйымдастырушыларға үлкен алғысымызды білдіреміз! Біз бұл оқиғаның бір бөлігі болғанымызға қуаныштымыз және біз үшін маңызды нәрселер туралы айтуға мүмкіндік бергендері үшін ризашылығымызды білдіреміз», — деді Kid Security қосымшасының тең құрылтайшысы Асат Ашаманов.
Фестиваль барысында қатысушылар медиа және коммуникация саласының сарапшыларымен кездесіп, заманауи үрдістерді, соның ішінде UGC-креатор мамандығының дамуын, сондай-ақ болашақ журналистер үшін халықаралық білім мен шет тілдерін меңгерудің маңыздылығын талқылады.
Медиаорталық бөлімінің жетекшісі Айнагүл Наурузованың айтуынша, фестиваль екінші жыл қатарынан өткізіліп келеді және біртіндеп жақсы дәстүрге айналуда. Оқушылар тарапынан жоғары қызығушылыққа байланысты ұйымдастырушылар оны жылына екі рет өткізуді жоспарлап отыр. Келесі фестиваль желтоқсан айына жоспарланған.
«AI-BALA» медиафестивалі жас таланттарды қолдауға арналған маңызды алаңға айналып, Қазақстанның жаңа буын журналистерін қалыптастырудағы елеулі қадам болды.
