Астанада иммундау апталығы жалғасып жатыр. №4 қалалық емханада адам папилломасы вирусына (АПВ) қарсы уақытылы вакцинацияның маңыздылығы туралы айтылды, деп хабарлайды astana-akshamy.kz.
Дәрігерлердің айтуынша, АПВ-ға қарсы иммундау – қатерлі ісіктің дамуын алдын ала болдырмауға мүмкіндік беретін сирек жағдайлардың бірі.
Астана қаласы әкімдігінің №4 қалалық емханасының балалар және босандыру ісі жөніндегі орынбасары Виктория Виниченконың айтуынша, Қазақстанда 2024 жылдың қыркүйегінде басталған мемлекеттік бағдарлама қазір белсенді түрде жүзеге асырылып жатыр.
Тақырыптың өзектілігі аурудың ауырлығымен байланысты: дәл осы АПВ жатыр мойны обырының негізгі себебі болып саналады. Сонымен қатар, бұл – вакцина арқылы алдын алуға болатын жалғыз онкологиялық ауру.
Қазақстан Дүниежүзілік денсаулық сақтау ұйымының жатыр мойны обырын жою жөніндегі жаһандық стратегиясына қосылғандықтан, 11-13 жастағы қыздарды вакцинациялаумен қатар ауқымды ақпараттық науқан да жүргізіліп жатыр. 2024 жылдың 17 қыркүйегінен бастап вакцина ұлттық екпе күнтізбесіне енгізілді.
«Адам папилломасы вирусы өте кең таралған: адамдардың көпшілігі өмірінде кемінде бір рет жұқтырады. Қауіптілігі – инфекция көбіне симптомсыз өтеді және тек жатыр мойны обырына ғана емес, аналды канал, жыныс мүшелері және жұтқыншақ обырына да әкелуі мүмкін. Вакцинация алдын ала қорғаныс ретінде әсер етеді: ол вирустың ең қауіпті түрлерін жұқтырудың алдын алады және жыныстық өмір басталғанға дейін жүргізіледі.
Сонымен қатар, мамандар вакцина емдеу емес, тек профилактика екенін атап өтеді», – дейді дәрігер.
Қазақстанда жыл сайын жатыр мойны обырының шамамен 1800 жаңа жағдайы тіркеледі, 600-ден астам әйел аурудың асқынған түрінен көз жұмады.
Бұл патология әйелдер арасындағы онкологиялық аурулар ішінде екінші орында тұр, сондықтан денсаулық сақтау жүйесі үшін маңызды мәселе болып саналады.
Вакцинация қарқыны біртіндеп өсіп келеді. Бағдарлама басталғалы бері елде 278 мыңнан астам екпе жасалған, ондаған мың қыз бала толық курсын аяқтаған. Вакцинацияға қызығушылық бар, бірақ барлық ата-ана екпені алдыра бермейді. Осыған байланысты медицина қызметкерлері, сондай-ақ гинекологтар мен онкологтар түсіндіру жұмысын жалғастырып жатыр.
«Дегенмен халықтың бір бөлігі вакцинацияға әлі де күмәнмен қарайды. Бас тартудың негізгі себептері – жанама әсерлерден қорқу, сенімді ақпараттың жетіспеуі және репродуктивті функцияға әсері туралы тараған мифтер», – деді Виктория Виниченко.
Дәрігерлер Қазақстанда ауыр жанама әсерлер тіркелмегенін, ал вакцинаның әлемнің 140-тан астам елінде қолданылатынын атап өтті. Вакцинациямен қамту деңгейі жоғары мемлекеттерде АПВ-мен сырқаттану 90%-ға дейін төмендеген.
