Әйелдердің кәсіпкерлік белсенділігінің басым бөлігі көтерме және бөлшек сауда саласына тиесілі, бұл бағытта 43,9 мың субъект қызмет атқарады. Сонымен қатар қызмет көрсету саласында 21 мың, жылжымайтын мүлікпен операциялар саласында 11,2 мың әйел кәсіпкер жұмыс істейді.
Әйелдер кәсіпкерлігі жаңа жұмыс орындарын ашуға және қаланың тұрақты экономикасын қалыптастыруға елеулі үлес қосуда. Осыған байланысты оны қолдау және одан әрі дамыту басқарманың негізгі басымдықтарының бірі болып қала береді.
Кәсіпкерлік белсенділікті ынталандыру мақсатында, оның ішінде әйел кәсіпкерлерге арналған бірқатар мемлекеттік қолдау бағдарламалары іске асырылуда.
Несие бойынша пайыздық мөлшерлемені төмендету бағдарламасы. Аталған тетіктер аясында несие бойынша сыйақы мөлшерлемесі 12,3 пайызға дейін төмендетіліп, қарыздың ең жоғары сомасы 200 млн теңгеге дейін жетуі мүмкін. Бұл кәсіпкерлердің қаржылық жүктемесін азайтып, бизнесті дамытуға қосымша мүмкіндік береді.
Келесі маңызды қолдау құралдарының бірі — «Даму» кәсіпкерлікті дамыту қоры арқылы кепілдендіру механизмі. Кепілдік мөлшері несие сомасының 85 пайызына дейін жетуі мүмкін, бұл банктер үшін тәуекелдерді азайтып, әсіресе жаңадан бастаған және дамып келе жатқан кәсіпкерлер үшін қаржыландырудың қолжетімділігін арттырады. Кәсіпкерлер кеңес алу үшін Астана қаласы бойынша «Даму» қорының филиалына (Мәңгілік Ел даңғылы, 55а) жүгіне алады.
Әлеуметтік кәсіпкерлер үшін 5 млн теңгеге дейінгі мемлекеттік гранттар қарастырылған. Негізгі талаптар – жобаны кемінде 20 пайыз көлемінде өз қаражаты есебінен бірлесіп қаржыландыру және жұмыс орындарын құру. Конкурсқа қатысу үшін әлеуметтік кәсіпкерлер тізіліміне енгізілу қажет. Қосымша ақпаратты 55-69-03, 55-69-21, 55-69-10 телефон нөмірлері арқылы алуға болады.
Қаржылық құралдармен қатар, әлеуметтік мәселелерді шешуге және халықтың өмір сапасын арттыруға бағытталған қаржылық емес қолдау шаралары да белсенді дамып келеді. Әлеуметтік кәсіпкерлік төрт санатқа бөлінеді, оның алғашқысы әлеуметтік осал топтардың, соның ішінде көпбалалы және толық емес отбасылардың жұмыспен қамтылуына ықпал ететін кәсіпкерлерді қамтиды.
Бүгінгі таңда әлеуметтік кәсіпкерлік тізіліміне 268 кәсіпкер енгізілген, олардың 195-і мемлекеттік преференцияларды алуға құқығы бар әйел басшылар. Бұл санаттағы бизнесті қолдау мақсатында субсидиялау тетігі аясында салалық шектеулер алынып тасталып, несие бойынша сыйақы мөлшерлемесі 11,3 пайызға дейін төмендетілді.
Әлеуметтік инноваторлар қауымдастығымен бірлесіп, елордада еліміздегі алғашқы Social Innovation Hub ашылуда. Бұл әлеуметтік кәсіпкерлікті дамытуға және қолдауға арналған мамандандырылған алаң.
Хаб әлеуметтік мәселелерді шешуге және халықтың өмір сапасын арттыруға бағытталған бастамалардың орталығына айналады. Оның құрамында ерекше қажеттіліктері бар адамдарды оқыту және жұмысқа орналастыруға арналған әлеуметтік кофехана, әлеуметтік кәсіпкерлер мен мүмкіндігі шектеулі жандардың өнімдерін ұсынатын шоурум, сондай-ақ білім беру және ғылыми-зерттеу орталықтары қарастырылған.
Сонымен қатар табысты жобаларды насихаттауға арналған видеостудия, халықаралық тәжірибе алмасу және тағылымдамалар бағыты іске қосылады. Жобалармен бірлесіп жұмыс істеуге арналған коворкинг кеңістігі де жұмыс істейтін болады. Әйел кәсіпкерлер мұнда кәсіби кеңес алып, білімін жетілдіріп, өз бастамаларын кеңейте алады.
«Қорытындылай келе, өз кәсібін бастау немесе дамытуға ниетті әйелдерге бірқатар маңызды ұсыныстарды атап өткен жөн. Ең алдымен бизнес негіздері бойынша оқудан өту маңызды.
Бұл кәсіпкерлік қызметтің құқықтық қырларын меңгеруге және стратегиялық жоспарлау дағдыларын қалыптастыруға мүмкіндік береді. Мұндай тегін бағдарламалар enbek.kz платформасында және Joltap жобасы аясында қолжетімді. Сондай-ақ, бизнес бағытын таңдауда нарық сұранысын ескеріп, бәсекелестік ортаны талдау және өз мүмкіндіктері мен қызығушылықтарын объективті бағалау ұсынылады.
Сонымен бірге, пайыздық мөлшерлемелерді субсидиялау, жеңілдетілген несие беру, кепілдендіру және мемлекеттік гранттар секілді қолданыстағы ШОБ-ты қолдау шараларын белсенді пайдалану қажет», – дейді спикер.
