Еркеғали Рахмадиев атындағы Мемлекеттік академиялық филармонияның концерт залында Халықаралық қарттар күніне арналған кеш өтті. Астана қаласы әкімінің орынбасары Есет Байкен қатысқан кеште өнер майталмандары мен жас өнерпаздар қарияларға мерекелік көңіл күй сыйлады.
Қалалық Ардагерлер кеңесінің төрағасы Сансызбай Есілов қарттарды құттықтау сөзінде олардың ел мен елордаға сіңірген ерен еңбегін, Отанға қызмет етудегі адалдығын айрықша атап өтті. Зейнетке шыққан Астананың алғашқы құрылысшыларының есімі құрметпен аталатынын, бүгінде де зейнеткерлердің біразы елорда өміріне белсенді араласып, бас қаланың көркеюі мен гүлденуіне үлес қосып келе жатқанын айтты. Қарттар асыл дәстүрлерді сақтаушы, қайсарлық пен мейірімнің, қамқорлықтың үлгісі екенін, өнегелі жолдары жас ұрпаққа бағыт-бағдар сілтейтінін айта келе, қала әкімдігі мен қалалық Ардагерлер кеңесі қарияларды қолдау мақсатында барлық ауданда Белсенді ұзақ өмір сүру орталықтарын, геронтология кабинеттерін ашқанын, шипажайларға жолдама беретінін жеткізді. Сөзін ақжарма тілегімен қорытындылады.
Концертте қарттардың сүйікті әндері, қанша уақыт өтсе де, ескірмейтін туындылар әуеледі. Атап айтқанда, халық әндерінен бастап, Латиф Хамиди, Нұрғиса Тілендиев, Шәмші Қалдаяқов, Әсет Бейсеуов секілді көрнекті композиторлардың шығармалары шырқалды. Бұған қоса, Арно Бабаджанян мен Муслим Магомаевтың әйгілі әндері ұсынылды. Қазақстан мен Татарстанның халық әртісі, Мемлекеттік сыйлықтың лауреаты Нұржамал Үсенбаева мен Қазақстанның халық әртісі Майра Ілиясованың сахнаға шығуы қарияларға үлкен сый болды. Мәдениет саласының үздігі Данияр Мұқан Сағи Жиенбаевтың өлеңіне жазылған Досхан Жолжақсыновтың «Ауыл қарттары» әнімен қарттардың қасиетін әспеттесе, ата-анаға деген құрметке шақыратын, алтын бесік – ауылды сағындыратын шығармалар ұсынылды. Жалпы алғанда, Қазақстанның еңбек сіңірген қайраткері Арайлым Рахым мен Естай Мұқашев, мәдениет саласының үздігі Нұрай Танабаев, «Дарын» мемлекеттік жастар сыйлығының лауреаттары Мұратбек Хайролда мен Ақбота Құснадин, белгілі әнші Фарида Жолдасова, халықаралық байқаулардың лауреаттары Шаһризада Тыныштық, Фируза Рахметова, Әділ Сұлтан, Белал Қуаныш, Қымбат Жамбылбек, Алтыншаш Мұқатаева, Айдын Жұмабай, Әкімхан Мәженов, Алтынбек Арыстанбек, Нұрсәт Алмас өнер көрсетіп, қарттардың құлақ құрышын қандырып, жансарайын ашты.
Аманғали ҚАЛЖАНОВ
