Елорда аумағында 33 мыңға жуық жеке тұрғын үй бар, оның 22 600-і пеште көмірмен жылыту арқылы жылытылады, 10 400-і орталық газбен жабдықтау желісіне қосылған. Бұл туралы елорданың Коммуникациялар қызметінде өткен баспасөз конференциясында Астана қалалық ТЖД Мемлекеттік өрт бақылау басқармасы басшысының орынбасары Ғабит Бабаев мәлім етті, деп хабарлайды astana-akshamy.kz.
Спикердің айтуынша, өрттің алдын алу және азайту мақсатында департамент жыл сайын жылыту маусымына дайындық жөніндегі іс-шаралар жоспарын әзірлейді, оны іске асыру биыл 15 тамыздан 2026 жылғы 20 сәуірге дейін жүзеге асырылады.
«Жоспарды іске асыру басталғаннан бастап, бірінші кезекте профилактикалық іс-шаралар халықтың әлеуметтік осал топтарының (ХӘОТ) тұрғылықты жерлері бойынша жүргізіледі. Алдын алу аулаларды аралау жолымен жүзеге асырылады, оның аясында тұрғындарға жадынамалар тапсырылады және пешті жылыту мен электр желілерін ұстау және пайдалану кезінде өрт қауіпсіздігі талаптары түсіндіріледі.
Әлеуметтік қорғау басқармасының берген ақпаратына сәйкес, 765 әлеуметтік осал топтағы отбасы есепке алынды. 132 үйде көміртегі тотығы датчиктері орнатылды, қалған 268 үйде сыртқы тексеру және батареяларды ауыстыру жүргізілді.
Осылайша, 15 тамыздан бастап жылыту кезеңіне дайындық шеңберінде 3 133 үй профилактикалық аралаумен қамтылды, 8 000-ға жуық бұзушылық анықталды (олардың ішінде 24%-ы жылыту жүйелеріне және 35%-ы электр энергиясына қатысты), оның 2 150-і сол жерде жойылды. Департамент анықталған бұзушылықтардың орындалуын бақылауды қарастырмайтынын атап өткен жөн», – дейді Ғабит Бабаев.
Сонымен қатар, құтқарушылар күніне орай ұйымдастырылған «30 игі іс» акциясы аясында әлеуметтік осал тұрғындарға нақты көмек көрсетілуде. Блогерлер мен еріктілердің қатысуымен үйлерге барып, датчиктер орнату, мұржаларды тазарту және пешті дұрыс қолдану бойынша түсіндіру жүргізіледі. Бұл – өрттің алдын алумен қатар, қоғам алдындағы әлеуметтік жауапкершіліктің де көрінісі.
Тұрғын үй секторында профилактикалық жұмыстар жалғасуда.
«Қорытындылай келе, тұрғындарды тұрғын үйлерінің қысқы кезеңге дайындығына тағы да назар аударуға шақырғым келеді.
Сондай-ақ, балаларды қараусыз қалдырмау керек екенін ескертемін, әсіресе суық мезгілде, олар түрлі қауіптерге тап болуы мүмкін. Балалардың қауіпсіздігі мен үйлердегі жылу – біздің ортақ жауапкершілігіміз.
Өткен аптада ауа температурасының төмендеуіне байланысты қала аумағында жеке тұрғын үйде 4 өрт тіркелді. Өрттердің шығу себебі электр құрылғыларын пайдалану кезіндегі өрт қауіпсіздігі ережелерінің бұзушылығы болып отыр», – дейді ТЖД Мемлекеттік өрт бақылау басқармасы басшысының орынбасары.
Ол өз сөзінде Астана қаласы ТЖД жылыту кезеңінде мынандай өрт қауіпсіздігі ережелерін қатаң сақтауды сұрайды:
• Жылыту маусымы басталғанға дейін жылыту құралдары мен түтін мұржаларының жарамдылығын тексеріңіз.
• Мұржаларды күйеден үнемі тазалауды қамтамасыз етіңіз.
• Қосылған электр аспаптары мен пештерді қараусыз қалдыруға болмайды.
• Үйде жасалған немесе ақаулы жылыту құрылғыларын пайдаланбаңыз.
• Электр желісін шамадан тыс жүктемеңіз: бір уақытта бірнеше қуатты электр құрылғыларын бір розеткаға қоспаңыз.
• Өрт болған жағдайда-дереу 101 немесе 112 нөміріне қоңырау шалыңыз.
