Астана қаласы Қоғамдық кеңесінің кезекті отырысында елорданың өңірлік нышандарын құқықтық тұрғыдан жаңарту және қалада қолжетімді ортаны қамтамасыз ету мәселелері қаралды, деп хабарлайды astana-akshamy.kz.
Отырыстың күн тәртібіне Қазақстан Республикасының астанасы – Астана қаласының өңірлік нышандарының сипаттамасын және оларды пайдалану тәртібін бекіту туралы, сондай-ақ Астана қаласында қолжетімді ортаны қамтамасыз ету қағидалары туралы нормативтік құқықтық актілердің жобалары енгізілді.
Жиында Астана қаласы Тілдерді дамыту және мұрағат ісі басқармасының басшысы Сәкен Есіркеп елорданың өңірлік нышандарына қатысты заңнамалық өзгерістерге тоқталды.
– 2026 жылғы 1 шілдеден бастап Қазақстан Республикасының Конституциясы мен 2026 жылғы 5 маусымдағы №299-VIII ҚРЗ «Қазақстан Республикасының астанасы мәртебесі туралы» Қазақстан Республикасының Конституциялық заңы қолданысқа енгізілді. Аталған заңнамалық өзгерістерге сәйкес елорданың өңірлік нышандарына қатысты құқықтық реттеу тәртібі жаңартылды, – деді Сәкен Есіркеп.
Оның айтуынша, осы өзгерістерге байланысты Астана қаласы әкімдігінің «Қазақстан Республикасы астанасы – Астана қаласының өңірлік нышандары туралы» қаулысының жобасы әзірленген. Сонымен қатар қолданыстағы «Қазақстан Республикасы астанасы – Астана қаласының рәміздері туралы» мәслихат шешімін жаңа заңнама талаптарына сәйкестендіру көзделіп отыр. Осы мақсатта құжаттың атауын «Қазақстан Республикасының астанасы – Астана қаласының өңірлік нышандарының сипаттамасын және оны пайдалану тәртібін бекіту туралы» Астана қаласы мәслихатының шешімі деп өзгертіп, жаңа редакцияда қабылдау ұсынылған.
Сәкен Есіркептің мәліметінше, әзірленген жоба қолданыстағы заңнама талаптарына сәйкес келеді. Қазіргі уақытта әкімдік қаулысының жобасына қол қойылып, мәслихатқа жолданған. Бұдан бөлек, нормативтік құқықтық актілердің жобасы ашық қоғамдық талқылауға шығарылған.
