23 тамыз күні Қазақстан Республикасы Құрылтайының сайлауы өтеді. Бұл – елдің қоғамдық-саяси өміріндегі маңызды науқанның бірі. Әрбір азаматтың сайлауға қатысып, өз таңдауын жасау мақсатында үйден дауыс беру мүмкіндігі де қарастырылған, деп хабарлайды astana-akshamy.kz.
Үйден дауыс беру денсаулық жағдайына байланысты сайлау учаскесіне өздігінен келе алмайтын азаматтарға арналған. Атап айтқанда, бұл мүмкіндікті бірінші және екінші топтағы мүгедектігі бар адамдар, төсек тартып жатқан науқастар, егде жастағы қарттар, сондай-ақ денсаулығына байланысты уақытша қозғала алмайтын азаматтар пайдалана алады. Сонымен қатар, ауыр науқасқа күтім жасап отырған азаматтар да заңда белгіленген тәртіппен үйден дауыс беру қызметіне жүгіне алады.
Үйден дауыс беру үшін азамат өз тіркелген сайлау учаскесіне алдын ала өтініш беруі қажет. Өтінішті сайлаушының өзі немесе оның атынан заң талаптарына сәйкес сенімді өкілі ұсына алады. Өтініште азаматтың сайлау учаскесіне келе алмайтын себебі көрсетіледі.
Белгіленген күні учаскелік сайлау комиссиясының мүшелері арнайы жылжымалы сайлау жәшігімен сайлаушының тұрғылықты мекенжайына барып, дауыс беру рәсімін өткізеді. Бұл кезде дауыс берудің құпиялылығы мен заң талаптарының толық сақталуы қамтамасыз етіледі.
Үйден дауыс беру мүмкіндігі – әрбір азаматтың конституциялық сайлау құқығын жүзеге асыруына жасалған маңызды кепілдіктердің бірі. Сондықтан денсаулық жағдайына немесе басқа да себептерге байланысты сайлау учаскесіне келе алмайтын азаматтар бұл құқықты пайдаланып, елдің қоғамдық-саяси өміріне белсенді қатыса алады.
