Астана қаласы бойынша Қазақстан Республикасы ІІМ қылмыстық-атқару жүйесі комитетінің №2 мекемесінде сотталғандар арасында өткен жазғы спартакиаданың жабылу салтанатына арналған спорттық іс-шара ұйымдастырылды, деп хабарлайды astana-akshamy.kz.
Шара Астана қаласы полиция департаменті мен Астана қаласы бойынша қылмыстық-атқару жүйесі департаментінің бірлесіп ұйымдастыруымен өткізіліп, есірткі құқық бұзушылықтарының, оның ішінде қайталама құқық бұзушылықтардың алдын алуға бағытталды. Жазғы спартакиада аясында волейбол, қол күресі, эстафета, арқан тарту және гір көтеру спорт түрлерінен жарыстар ұйымдастырылды. Қатысушыларды дайындауға және жарыстарды өткізуге кәсіби спортшылар мен спорт шеберлері атсалысты. Олар өз тәжірибелерімен бөлісіп, жеке үлгілері арқылы сотталғандарды салауатты өмір салтын ұстануға, спортпен тұрақты айналысуға ынталандырды. Іс-шараға арнайы шақырылған қонақтар қатарында "Жасыл Желкен" қоғамдық бірлестігінің төрайымы Гүлзат Алмажанова, психолог, Астана қаласындағы жоғары оқу орындарындағы есірткінің алдын алу жөніндегі психологиялық профилактика комитеттерінің үйлестірушісі Мирзада Сейтқали және Астана қаласының толық байланыстағы каратэ қауымдастығының төрағасы Айрат Жеңіс болды.
Кездесу барысында қатысушылармен есірткіден бас тартудың маңыздылығы, спорттың тұлғаның дұрыс өмірлік ұстанымдарын қалыптастырудағы рөлі, сондай-ақ болашаққа жауапкершілікпен қараудың қажеттілігі жөнінде ашық пікір алмасу өтті. Іс-шараның негізгі мақсаты – сотталғандар арасында салауатты өмір салтын насихаттау, тәртіпті нығайту, командалық рухты дамыту және заңға бағынатын өмір салтын ұстануға тұрақты ынта қалыптастыру. Мамандардың айтуынша, мұндай тәрбиелік және спорттық іс-шаралар қайталама қылмыстар мен есірткіге байланысты құқық бұзушылықтардың алдын алудың тиімді тетіктерінің бірі саналады. Спорт адамның ерік-жігерін шыңдап, жауапкершілік сезімін қалыптастырады, ұжымда жұмыс істеу мәдениетін дамытады және сотталғандардың қоғамға қайта бейімделуіне, жаңа өмір бастауына оң ықпал етеді.
