«Заң мен тәртіп» идеологиясы аясында Астана қаласы бойынша Экономикалық тергеп-тексеру департаментінің қызметкерлері елордалық әкімдікке қарасты №2 қалалық көпбейінді аурухананың медицина қызметкерлеріне ақпараттық-түсіндіру дәрісін өткізді, деп хабарлайды astana-akshamy.kz.
Кездесу барысында қаржылық және цифрлық қауіпсіздік мәселелеріне, сондай-ақ алаяқтықтың кең таралған түрлеріне ерекше назар аударылды.
Қатысушыларға қаржы пирамидасының негізгі белгілерін қалай анықтауға және осындай алаяқтық схемалардың құрбаны болмауға болатыны түсіндірілді. Департамент өкілдері күмәнді инвестициялық ұсыныстарға тән белгілер, кепілдендірілген жоғары табыс туралы уәделер және қаражат аудармас бұрын қаржы ұйымдары туралы ақпаратты мұқият тексерудің маңыздылығы жөнінде айтып берді.
Сонымен қатар кездесуде дипфейк технологияларының қаупі де сөз болды. Бұл технологиялар шынайы көрінетін жалған фото, аудио және бейнематериалдар жасауға мүмкіндік береді. Қатысушыларға цифрлық контенттің жалған екенін анықтау тәсілдері түсіндіріліп, әлеуметтік желілер мен мессенджерлерде таралатын ақпаратқа сыни тұрғыдан қараудың маңыздылығы атап өтілді.
Осындай профилактикалық іс-шараларды өткізу азаматтардың қаржылық және цифрлық сауаттылығын арттыруға, ақпараттық кеңістікте қауіпсіз мінез-құлық дағдыларын қалыптастыруға және құқық бұзушылықтардың алдын алуға бағытталған.
Астана қаласы бойынша Экономикалық тергеп-тексеру департаменті азаматтардың хабардарлығын арттыруға және «Заң мен тәртіп» қағидаттарын нығайтуға бағытталған жүйелі ақпараттық-түсіндіру жұмыстарын жалғастыруда.
