Елорда полиция департаментінің кинологиялық қызмет орталығында қуанышты жаңалық. Мұнда полицияның болашақ төрт аяқты көмекшілері болатын төрт күшік дүниеге келді, деп хабарлайды astana-akshamy.kz polisia.kz сайтына сілтеме жасап.
Күшіктердің анасы – жоғалған адамдарды іздеуге маманданған Хлоя Дея есімді қызметтік бельгиялық овчарка. Бұл – оның алғашқы төлі. Ал күшіктердің әкесі – қызметтегі нәтижелерімен танылған Бакс. Ол полиция қызметкерлеріне есірткі заттарын анықтауға бірнеше рет көмектескен тәжірибелі қызметтік ит. Бүгінде күшіктердің жасы екі айға толды. Олар белсенді өсіп, ойнап, күн сайын қамқорлық көрсететін кинологтарға біртіндеп бейімделіп келеді.
Жастарының кішілігіне қарамастан, олардың болашақ қызметке бейімділігін анықтау мақсатында алғашқы тестілеу басталды. Мамандар күшіктердің мінез-құлқын, белсенділігін, зейінін, қоршаған ортаға реакциясын және қызметтік ит үшін маңызды өзге де қасиеттерін бағалайды. Ал тестілеудің күрделірек кезеңі олар алты айға толғанда жүргізіледі. Осы сынақтардың нәтижесі әр күшіктің қабілеті мен әлеуетін анықтап, әрі қарайғы дайындық бағытын таңдауға мүмкіндік береді.
Әзірге төрт кішкентай тәрбиеленушіні алаңсыз балалық шақ, ойын және кинологтардың қамқорлығы күтіп тұр. Ал оларды алда арнайы жаттығулар, оқу және елорда тұрғындарының қауіпсіздігін қамтамасыз етуге бағытталған жауапты қызмет күтіп тұр. Бұл толықтыру кинологиялық қызмет орталығының ұжымы үшін үлкен қуаныш. Бүгінде кішкентай күшіктер болса, алдағы уақытта олар полиция қызметкерлерінің сенімді серігіне айналып, елорданың қауіпсіздігін қамтамасыз етуге өз үлесін қосатын төрт аяқты көмекшілер қатарын толықтырмақ.
