Астана қаласы әкімдігінің Музыкалық жас көрермен театры 2026 жылдың 9 қазан күні сағат 19:00-де және 11 қазан сағат 18:00-де «Ана жолы» атты перформанс жанрындағы қойылымының премьерасын көрермен назарына ұсынады, деп хабарлайды astana-akshamy.kz.
Сахналық нұсқасын жасаған және режиссері: Іңкәр Каримова.
«Ана жолы» – деректі театр мен заманауи сахна тілін ұштастырған пластикалық-музыкалық спектакль-перформанс. Пьесаның авторы және қойылым режиссері – Іңкәр Каримова.
Спектакльде жеті жас актриса өз кейіпкерлерінің аналарының өмір жолын, бастан өткерген қиындықтары мен сырларын баяндайды. Отбасылық естеліктер мен оқиғалар арқылы әйел тағдыры, ана мен қыздың байланысы, қоғамның әйелге қоятын талаптары туралы шынайы әңгіме өрбиді. Кейіпкерлер тек өз аналарының оқиғасын айтып қана қоймай, олардың таңдауларына, өмірлік ұстанымдарына өз көзқарасын білдіреді.
“Ал біз аналарымыздың орнында болсақ, қандай өмір сүруші едік?” - деген маңызды сұрақ туындайды.
«Ана жолы» – көрерменді дайын жауапқа жетелемейтін, керісінше өз анасы туралы, өз отбасы және ХХІ ғасырдағы әйел тағдыры туралы ойлануға шақыратын спектакль. Қойылымда көрерменмен тікелей қарым-қатынас, сахна мен зал арасындағы шекараны бұзады.
Пластика, музыка, деректі мәтіндер мен манифест тоғысқан спектакль – қыз, әйел, ана атаулысына құрмет пен алғыстың сахналық көрінісі.
Қойылым тобы: Қоюшы-режиссері – Іңкәр Каримова, қоюшы хореограф – Камила Бузанова, қоюшы-суретшісі – Іңкәр Каримова, музыкамен көркемдеген – Осман Абайділдә, жарық суретшісі – Асылбек Оспанов, режиссердің ассистенті – Айза Абельбасова, редактор — Нұрлыгүл Ғалымжанқызы, Айза Абельбасова, декоратор — Мақсат Сүйінғали.
Орындаушылар: Актриса 1 — Нұрай Рысбекова, Дана Верещак, актриса 2 — Лаура Аязбаева, Дана Қабылова, актриса 3 — Аружан Темірханова, актриса 4 — Майра Марғұланқызы, актриса 5 — Айдана Болат, Жансұлу Төлеген, актриса 6 — Айя Дарибаева, Аружан Бағзат, актриса 7 — Айдана Жетешова, Альфия Хайзуллиева.
Қойылым ұзақтығы: 1 сағат 30 минут.
