Астана әкімдігінің павильоны қалада өтіп жатқан Өңірлік экологиялық саммитте бірден екі марапатқа ие болды. Экспозиция «Үздік стенд безендіруі» және «Технологиялардың үздік таныстырылымы» номинацияларында жеңіске жетті, деп хабарлайды astana-akshamy.kz.
Аумағы 36 шаршы метр болатын павильон жасыл технологиялар мен тұрақты шешімдердің халықаралық көрмесі аясында ұсынылды. Екі деңгейлі архитектураның арқасында жалпы экспозициялық аймақ 50 шаршы метрден асты.
Тұжырымдама кеңістікті тік бағытта дамытуға негізделді – бұл шешім ашық әрі визуалды тұрғыдан жеңіл құрылым жасауға мүмкіндік берді.
Орталық элемент ретінде ағаш діңі түріндегі тік LED-инсталляция орналастырылып, бүкіл композиция соның айналасына құрылды. Контент тұрақты дамудың метафорасы ретінде ағаштың өмірлік циклін көрсетті. Бірінші деңгейдің периметрі бойына панорамалық LED-экран орнатылып, онда қаланың негізгі даму бағыттары – ауаны тазарту және қалдықтарды қайта өңдеу жобаларынан бастап жасыл белдеу мен туристік орындарға дейін таныстырылды.
Екінші деңгейде инсталляция кинетикалық тәж түрінде жалғасып, біртұтас визуалды бейне қалыптастырды.
Кеңістік іскерлік кездесулер мен стратегиялық талқылаулар өткізу үшін пайдаланылып, экологиялық күн тәртібінде басқару мен бизнестің рөлі айқындалды.
Минималистік ақ интерьер таза парақты және табиғат алдындағы жауапкершілікті бейнелеп, кеңістікті визуалды түрде кеңейтті. Безендіруде заманауи композиттік материалдар, су негізіндегі гипоаллергенді бояу қолданылды.
Ұйымдастырушылардың айтуынша, Астана павильоны жай ғана көрме стенді емес, архитектураны, технологияларды және экологиялық мағыналарды біріктірген тұтас тұжырымдамаға айналып, қаланы заманауи әрі тұрақты мегаполис ретінде көрсетті.
