Kazakh Spine Days 2026 халықаралық жұлын нейрохирургиясы конференциясы өтуде
16–17 мамыр күндері Астанадағы Ұлттық нейрохирургия орталығы базасында Kazakh Spine Days 2026 жұлын нейрохирургиясы бойынша халықаралық білім беру курсы өтуде, деп хабарлайды astana-akshamy.kz.
Іс-шара омыртқа хирургиясы саласындағы жетекші отандық және шетелдік нейрохирургтарды, зерттеушілер мен жас дәрігерлерді біріктіріп, омыртқа ауруларын емдеудің заманауи тәсілдерін талқылауға, клиникалық тәжірибе алмасуға және халықаралық кәсіби ынтымақтастықты дамытуға бағытталды.
Конференцияға Түркия, Ұлыбритания, Оңтүстік Корея, Қытай, Пәкістан және басқа елдерден танымал халықаралық сарапшылар қатысуда.
Негізгі спикерлер қатарында:
— Yahya Güvenç — омыртқа хирургиясы саласындағы мамандарды біріктіретін International Spine Society (ISS) халықаралық қоғамының президенті (Түркия);
— Mehmet Zileli — Нейрохирургиялық қоғамдардың дүниежүзілік федерациясы (WFNS) Жұлын нейрохирургиясы комитетінің негізін қалаушы және алғашқы төрағасы, WFNS-тің құрметті мүшесі (Түркия).
— Серік Ақшолақов — Қазақ нейрохирургтар ассоциациясы мен Ұлттық нейрохирургия орталығының президенті, еліміздің бас штаттан тыс нейрохирургы, профессор, ҚР ҰҒА академигі.
Ғылыми бағдарлама қазіргі заманғы жұлын нейрохирургиясының өзекті бағыттарын қамтиды, оның ішінде:
• омыртқаның кіші инвазиялық және эндоскопиялық хирургиясы;
• омыртқа деформацияларын түзету;
• омыртқаның дегенеративті аурулары;
• жұлын жарақаттары;
• омыртқа және жұлын ісіктері;
• заманауи технологиялар мен дәлелді медицинаның қағидаттарын енгізу.
Бағдарламада анатомиялық макеттер мен симуляциялық модельдерді қолдана отырып өткізілетін тәжірибелік сабақтар — Hands-on workshop on models ерекше орын алады. Қатысушылар теориялық аспектілермен танысып қана қоймай, халықаралық сарапшылардың жетекшілігімен омыртқаға жасалатын хирургиялық араласулардың жекелеген кезеңдерін тәжірибе жүзінде меңгере алады.
Workshop аясында заманауи хирургиялық қолжетімділіктер, корпрэктомия, остеотомия және омыртқаны бұрандалы фиксациялау техникалары ұсынылды.
Қазақстанда осындай білім беру іс-шараларын өткізу отандық нейрохирургияны дамыту және мамандарды халықаралық стандарттарға сәйкес даярлау үшін маңызды мәнге ие. Конференция жұлын нейрохирургиясы саласындағы кәсіби диалогқа, тәжірибе алмасуға және халықаралық ынтымақтастықты нығайтуға арналған алаңға айналды.
БАҚ өкілдері үшін бұл шара жұлын нейрохирургиясы саласындағы әлемдік жетекші сарапшылармен сұхбаттасуға, заманауи медициналық технологиялармен танысуға және Қазақстандағы жоғары технологиялық медицинаның дамуын жариялауға мүмкіндік берді.
