Астанада жастар арасында ғылыми-техникалық шығармашылықты дамыту және инженерлік, технологиялық мамандықтарды насихаттау мақсатында 18 қазан күні 8-11 сынып оқушыларына арналған «Білімдегі инновациялар» қалалық STEM олимпиадасы өтеді, деп хабарлайды astana-akshamy.kz.
Астана қаласының әкімдігі мен «Астана Innovations» АҚ іс-шараны Республикалық «Дарын» ғылыми-практикалық орталығының, Астана қаласының Білім басқармасының және «STEM Academia» ЖШС-нің қолдауымен өткізеді.
STEM Олимпиадасы оқушылардың ғылымға, технологияға, инженерияға және математикаға деген қызығушылығын арттыруға, зерттеу және жобалау дағдыларын қалыптастыруға, сондай-ақ талантты оқушыларды анықтау мен қолдауға бағытталған.
Іс-шара бағдарламасына кіреді:
1. Жарыстар: қатысушылар STEM-бағыттары бойынша практикалық тапсырмалар мен жобаларды орындайды.
2. Дәрістер мен мастер-класстар: тәжірибелі оқытушылар мен салалық сарапшылар ғылым мен технологиядағы заманауи тақырыптар бойынша оқыту сессияларын өткізеді.
3. Мәдени бағдарлама: іс-шара қатысушыларға арналған ойын-сауық белсенділіктерімен және ойындармен сүйемелденеді.
Жеңімпаздар мен жүлдегерлер өз жетістіктері үшін құнды сыйлықтар және дипломдармен марапатталады.
Олимпиадаға елорданың әртүрлі мектептерінен 200-ден астам оқушы қатысады. Олар робототехника, инженерлік іс, бағдарламалау және 3D-модельдеу сияқты бағыттар бойынша жарысады.
Бұл іс-шара оқушылардың инженерлік ойлауы мен ғылыми әлеуетін дамытудағы маңызды қадам, сондай-ақ болашақ ғалымдар, инженерлер және өнертапқыштар арасында идеялар алмасуға және шабыт алуға арналған алаң болады.
