Қоғамдық тыңдаулар қарсаңында қалалық мәслихат депутаттары бірқатар елордалық базарларды аралады, деп хабарлайды astana-akshamy.kz.
Аралау барысында олардың қазіргі жағдайын және әлеуметтік маңызы бар азық-түлік тауарларына тұрақты баға қамтамасыз етуге дайындығын бағалады.
Тексеру нәтижесінде анықталғаны:
- «Алаш» пен «Шарын» базарлары заман талабына сай емес, жаңғыртылмаған, сумен жабдықтау және кәріз жүйелері жоқ, санитарлық талаптар сақталмаған. Сатушыларға қолайлы жағдай жасалмаған. Өрт қауіпсіздігі нормаларына сәйкес келмейді, өрт сөндіру гидранттары жоқ. Келген адамдарға автотұрақ қарастырылмаған, базар ішінде көлік қозғалысы реттелмеген.
- Киім-кешек базары «Central Market» толық жаңғыртылған, санитарлық және өрт қауіпсіздігі талаптарына сай, бірақ базар ауласында заман талабына сай емес контейнерлі сату орналасқан.
- «Әлем» және «Сарыарқа» базарлары бұрынғы «Целинсельмаш» зауытының цехында орналасқан. Әлем базары жаңғыртудан өтіп, екі қабатқа бөлінген, заман талабына сәйкес модернизация жасалған. Сарыарқа базарына дәл осындай жаңарту жұмыстары қажет.
- «Көктал» фермерлік базары заманауи форматта салынған, кинотеатрына дейін бар, толық жабдықталған.
- «Ұлжан» базары — бейберекет (стихиялық) сауда орны, жаңғырту басталмаған, санитарлық және өрт қауіпсіздігі нормаларына сай емес, сатушыларға қолайлы жағдай жасалмаған.
Сонымен қатар, әлеуметтік маңызы бар азық-түлік тауарларын сату мәселелері талқыланып, баға саясатын бақылауды күшейту тапсырылды.
