Ораза Айт құтты болсын!

0 287

BAL_1677 - копия

Қадірлі мұсылман бауырлар! Айлардың сұлтаны әрі күллі мұсылман баласы үшін қасиетті Рамазан айымен қимай қоштасатын күн де таяп қалды. Еліміздегі барша мұсылман қауым шіліңгір шілденің ыстығына қарамастан парыз болған оразасын ұстап, түнін тағат-құлшылықпен өткізді.

Наурызбай қажы ӨТПЕНОВ,
ҚМДБ-ның Астана қаласы бойынша өкілі, «Нұр Астана» орталық мешітінің бас имамы:

МҮБӘРАК АЙДЫҢ АЙРЫҚША МЕРЕКЕСІ

Шынында, Рамазан – құлшылық, сабыр, береке, мейірім, рахым, қайырымдылық айы. Міне, осы айда сауап алу мақсатымен көптеген мұсылман бауырларымыз жер-жердегі үлкенді-кішілі қайырымды істерге хал-қадірінше атсалысып, Рамазан айын халықтық деңгейде өткізуге өз үлестерін қоса білді. Ел мұсылмандары Рамазан айының ерекшелігін сезініп, бір ай бойы рухани жігерге бөлене алды.

Алла елшісінің (с.а.с) сахих хадистерінде Айт мейрамына тамақ жеп, сусын ішу, Алланы еске алу, қонақ күту, сырқат мұсылмандардың көңілін сұрау мен жоқ-жітік, кембағалдарға садақа беру тән екендігі айтылған. Олай болса, айт күндерін ізгі амалдарымызды кемітпестен көтеріңкі мерекелік көңіл-күймен және басқа да сауабы мол істермен өткізген мақұл.

Пайғамбарымыз (с.а.с) Меккеден Мединеге қоныс аударғанда, жергілікті халықтың мейрамдап, көңіл көтеріп жүргенін көріп: «Бұл қандай мереке?» деп сұрағанда, олардан: «Бұл – біздің Исламға дейінгі тойлап келе жатқан мерекеміз», – деген жауап естіді. Сонда Алла Елшісі (с.а.с): «Алла сіздерге мұнан да ұлық екі мереке берді. Олар – Рамазан және Құрбан айттары!» – деп, осы екі ислами мейрамдардың ұлық екендігін сездірген.

Айттың өзіне лайық жарасымды да сауабы мол амалдары жетерлік. Сол таңда ерте оянып, ғұсыл құйынып, дәрет алып, таза, жаңа киім киіп, жұпар иіс сеуіп, айт намазына қатысу – сүннет.

Айт мерекесінде ата-ана мен қарияларға сәлем беріп, батасын алу, сырқат кісілердің үйіне (ауруханаға) зиярат етіп, көңілін сұрау да ізгі амалдар қатарына жатады.

ОРАЗА АЙТ МЕРЕКЕСІНІҢ БАҒДАРЛАМАСЫ

Қасиетті айдың қуанышын сүйіншілейтін Ораза айт күндері елорда мешіттерінде түрлі шаралар ұйымдастырылмақ. Атап айтсақ, 28 шілде күні сағат 06:00-06:30 аралығында қасиетті Құран аяттары оқылып, 06:30-07:00 аралығында Ораза айтына арналған мерекелік уағыз айтылып, айт намазының оқылу ерекшелігі баяндалады. Сағат 07:00-де мерекелік Ораза айт намазы оқылады. Елордалық мұсылмандарға мерекелік көңіл-күй сыйлау мақсатында сағат 10:00-ден бастап бас шаһардағы «Нұр Астана», «Әзірет Сұлтан» және «С.Ғылмани» мешіттерінің аулаларына киіз үйлер тігіліп, мерекелік дастарқан жайылады. Сондай-ақ, қазақи дәстүрімізге сай ұлттық спорттық ойындардан жарыстар өткізіліп, ән-термелер жырланып, мәдени іс-шаралар ұйымдастыру жоспарлануда. Барша елордалық мұсылмандарды мерекелік айт намазына қатысып, мәдени шараларды тамашалауға шақырамыз.

Араздасып қалған кісілермен татуласып, қатынас үзілген туыстардың үйлерін аралаудың да маңызы ерекше. Өйткені, Алла тағала: «Сен, кешірім жолын ұстан, жақсылыққа бұйыр, надандықтан бет бұр» («Ағраф» сүресі, 199-аят) деп мүміндерді барынша кешірімді болуға үндеген. Көңілі жабырқау, қамқорлыққа мұқтаж жандар мен жоқ-жітіктер айт күндерінде көбірек көмек-қолдау, садақа күтіп, дәметері хақ. Сондықтан да мұндай жандарға қайыр-садақа үлестіріп, көңілдерін аулаған абзал.

Ораза айт адамдарды бауырмалдылық пен кішіпейілділікке, кешірімділік пен сүйіспеншілікке шақырады. Бұл күндері үй-үйде мерекелік дастарқан жайылып, туған-туыс, дос-жаран, көрші-қолаң бір-бірін аралап, дәм татысып, мәре-сәре болады.

Ел мұсылмандарын ұлтаралық келісім мен дінаралық төзімділікті одан әрі де нығайтуға, сүйікті Отанымызды өркендету мен оның мәдени, рухани құндылықтарын сақтап, дамыта түсуге мұнан былай да күш-жігерін аямай жұмсай беруге шақырамыз. Біздегі бүгінгі өзара сыйластық пен жарасымдылық, ынтымақтастық пен діндерге деген құрмет – басты мақсатымыз болып қала бермек. Біз бұл жетістіктеріміз үшін Алла Тағалаға сансыз мадақ айтып, шүкірлік етуге тиіспіз.

Құрметті ағайын! Баршаңызды ең қасиетті де ұлық мереке – Ораза айт мейрамының келуімен шын жүректен құттықтаймын! Мұсылман баласын қуанышқа бөлейтін бұл мейрам елімізге, жерімізге құт-береке мен ынтымағын, ырысы мен берекесін ала келсін деп тілейміз. Алла тағала баршамыздың ұстаған оразамызды бен жасаған құлшылық-ғибадаттарымызды және сауапты істерімізді қабыл етіп, келер жылғы Рамазан айына аман-есен жетуді нәсіп еткей. Халқымыздың ынтымақ-бірлігін арттырып, ырыс-несібесін адалынан молайтқай! Дінімізге қуат, халқымызға иман байлығын бергей! Әумин!

Пікір жазу

Почтаңыз жарияланбайды

seventeen + thirteen =