Астанада еліміздің әр өңірінен келген суретшілерді бір алаңға біріктірген «Елорда – өнер бұлағы» атты бес күндік республикалық арт-симпозиум өтіп жатыр, деп хабарлайды astana-akshamy.kz.
Іс-шараға Қазақстанның мәдениет қайраткері, суретші-мүсінші Құралбек Қосақов, суретші-саяхатшы Марат Төтеев, «Мәдениет үздігі» төсбелгісінің иегері Бақытжан Құлбаев, суретші-реставратор әрі педагог Талғат Тәтиев, суретші және мәдениет қайраткері Әкертіс Солтанбаев, Қазақстан Суретшілер одағының мүшесі Нұрбек Жәрдемов және басқа да шеберлер қатысуда.
Бес күн бойы суретшілер елорданың тарихы, сәулеті, заманауи дамуы мен күнделікті тыныс-тіршілігін арқау етіп, жаңа туындыларын дүниеге әкеледі. Әр суретші Астананы өзінше қабылдап, оны түс, жарық, қозғалыс, адам тағдыры мен жеке әсерлері арқылы бейнелейді.
«Астана қаласы Суретшілер одағы» қоғамдық бірлестігінің басқарма төрағасы Өмірғали Исмағұловтың айтуынша, мұндай симпозиумдарды өткізу жаңа идея емес. Алайда, биылғы жоба елордаға және оның өзгеріп жатқан келбетіне арналған.
«Қазір Астанада көптеген әдемі орындар пайда болып, лайықты көрікті жерлер ашылды. Оның үстіне, Астана – Қазақстанның елордасы. Сондықтан суретшілер арасында симпозиум өткізуді ұйғардық. Оған өңірлерден келген суретшілермен қатар жергілікті шеберлер де қатысып жатыр. Олар – тиісті білім алған кәсіби суретшілер. Қатысушылардың арасында Қазақстан Суретшілер одағының мүшелері мен Қазақстан Көркемөнер академиясының академиктері бар. Белгілі заманауи суретшілерді жинап, олардың Астананың көрікті жерлерін өз шығармаларында бейнелеп, туындыларын қалаға ұсынуын мақсат еттік», – деді ол.
Ұйымдастырушылар үшін шараның мақсаты – қаланы өнер арқылы таныту ғана емес, суретшілердің шығармашылығына көпшіліктің назарын аудару. Өмірғали Исмағұловтың сөзінше, мұндай кездесулер бейнелеу өнерін насихаттап қана қоймай, кәсіби тәжірибе алмасуға мүмкіндік береді.
«Мұндай симпозиумдарды жыл сайын өткізгіміз келеді. Өйткені адамдар суретшілерді эстрада өкілдеріне қарағанда әлдеқайда аз біледі. Әншілер мен музыканттар теледидардан жиі көрсетіліп, олар туралы көп айтылады. Ал бейнелеу өнері де адамдардың өмірінің бір бөлігі болуы керек. Сондықтан мұндай шараларды жиі өткізіп, халыққа өткен және қазіргі суретшілерді таныта түскен жөн. Бізде танымал шеберлер көп. Сонымен қатар мұндай кездесулер тәжірибе алмасуға жол ашады. Суретші – жеке тұлға, әдетте өз шеберханасында жұмыс істейді. Ал осындай іс-шаралар бір-бірінен тәжірибе жинақтап, білім алмасуға және шеберлікті шыңдауға мүмкіндік береді», – деп қосты ол.
Симпозиумға қатысу үшін суретшілер кәсіби іріктеуден өтеді. Олар өз туындылары мен эскиздерін ұсынып, арнайы комиссия қатысушыларды анықтайды. Комиссия құрамына танымал шеберлер мен өнертанушылар енген.
Биылғы симпозиум осындай форматтағы үшінші жоба болып отыр. Бұған дейінгі кездесулердің тақырыптары өзгеше болған. Мәселен, былтыр суретшілер жұмысшы мамандықтарына арналған туындыларын ұсынған. Ал биыл шығармашылық тұрғыдан басты нысан ретінде елорда таңдалды.
«Бұл жобаны өткізуге Астана қаласының әкімдігі және тікелей қаланың Мәдениет басқармасы қолдау көрсетті. Бұған дейінгі симпозиумдардың тақырыптары әртүрлі болды. Былтыр Жұмысшы мамандықтар жылы аясында суретшілер түрлі кәсіптерге арналған туындылар жасады. Ал биыл симпозиумды Астанаға арнадық. Елордадағы әсем орындар мен көрікті жерлерді көрсеткіміз келеді. Бұл туризмді дамыту тұрғысынан да маңызды. Көрнекі құралдар, суретшілер мен шеберлердің шығармашылығы арқылы қаламыздың сұлулығын жаңа қырынан көрсетуге болады», – деді Өмірғали Исмағұлов.
Симпозиум аясында жасалған туындылар жоба аяқталғаннан кейін қалаға табысталады. Кейін картиналар қорларда сақталуы немесе музейлердің коллекцияларына берілуі мүмкін.
Биылғы симпозиумның тағы бір тақырыбы – жасанды интеллектінің қалалық ортаға, шығармашылыққа және мәдени кеңістіктің дамуына ықпалы.
Жоба аясында пікірталастар, дәрістер, шеберлік сабақтары мен еркін форматтағы көрсетілімдер ұйымдастырылып, қатысушылар мен қонақтар дәстүрлі көркемдік тәсілдермен қатар, заманауи өнердің жаңа сын-қатерлерін талқылауда.
Бес күндік шығармашылық жұмыстың қорытындысы ретінде 25 қыркүйекте көрме ашылады. Көрме 1 қазанға дейін жалғасады. Экспозицияда симпозиум аясында жасалған 40-тан астам шығарма ұсынылады.
