Бүгінде шағын және орта бизнес елорда экономикасының негізгі тірегіне айналып отыр. Осы салада 540 мыңнан астам астаналық еңбек етеді, яғни қаланың жұмысқа қабілетті халқының 70,3%-ын құрайды. Жалпы бас шаһарда 272 мың шағын және орта бизнес субъектісі жұмыс істейді. Соңғы мәліметтерге сәйкес, Астана әлеуметтік кәсіпкерлікті дамыту бойынша көшбасшы болып келеді. Мұнда 268 әлеуметтік кәсіпкер тіркелген. Бұл – ел бойынша ең жоғары көрсеткіш.
Шағын және орта бизнес бүгінде Астананың жалпы өңірлік өнімінің үштен екісінен астамын қалыптастырып, жұмыспен қамтудың негізгі драйвері болып отыр.
Елордада 272 мың шағын және орта бизнес субъектісі жұмыс істейді. Бұл өткен жылмен салыстырғанда 11,4%-ға көп. Бүгінгі таңда осы салада 540 мыңнан астам адам еңбек етеді, яғни қаланың еңбекке қабілетті халқының 70,3%-ын құрайды.
Жылдың бірінші жартыжылдығында шағын және орта бизнес кәсіпорындары 8,3 трлн теңгеге тауарлар мен қызметтер өндірді. Бұдан бөлек, елордадағы барлық салық түсімінің 56%-ы, яғни 762,5 млрд теңге дәл осы сегменттің үлесіне тиесілі. Іс жүзінде қала бюджетіне түсетін әрбір екінші теңге – кәсіпкерлік белсенділіктің нәтижесі.
Дамудың негізгі құралы 2023-2027 жылдарға арналған, шағын және орта бизнесті, өнеркәсіпті, сауданы және туризмді қамтитын «Астана кәсіпкерлігі» өңірлік бағдарламасы болды. Оның аясында Кәсіпкерлікті дамыту қоры «Даму»-мен бірлесіп «Астана бизнес» жеңілдетілген несиелеу бағдарламасы жүзеге асырылуда. 2024 жылы жалпы сомасы 6 млрд теңгені құрайтын 377 жоба қолдау тапса, 2025 жылы 3,4 млрд теңгеге 230 жобаға қолдау көрсетілді. Бағдарламаның жалпы лимиті 8 млрд теңгені құрайды.
Қосымша ретінде 12,6% мөлшерлемемен және 7 млрд теңгеге дейінгі несиелеу лимитімен «Өрлеу» бағдарламасы енгізілді, сондай-ақ кепілдігі жеткіліксіз кәсіпкерлерге қарыз сомасының 85%-ына дейін кепілдік беретін «Даму» кепілдік қоры құрылды.
Жыл басынан бері субсидиялау, кепілдендіру, жеңілдетілген несиелеу және кепілдік қоры арқылы 800-ден астам жобаға қолдау көрсетілді.
Астана әлеуметтік кәсіпкерлікті дамыту бойынша көшбасшы болып қала береді. Мұнда 268 әлеуметтік кәсіпкер тіркелген. Бұл – ел бойынша ең жоғары көрсеткіш. Негізгі бағыттар – мектепке дейінгі білім беру және балаларға арналған оңалту орталықтары.
Қазақстандағы алғашқы Social Innovation Hub-тың ашылуы қосымша серпін болды, ол әлеуметтік жобаларды оқыту, тәлімгерлік ету және дамыту алаңына айналды.
Туризм де кәсіпкерліктің ең қарқынды бағыттарының бірі. Тек 2025 жылдың бірінші жартыжылдығында елордаға шамамен 750 мың турист келді, оның 180 мыңы – шетелдік қонақтар.
Оқиғалық туризм өзінің экономикалық тиімділігін дәлелдеді: Jennifer Lopez пен Backstreet Boys концерттері салаға шамамен 13,3 млрд теңге кіріс әкелді. 2024 жылы Астанада 128 халықаралық іс-шара өтсе, 2025 жылы олардың саны 200-ден асты деп жоспарлануда.
Елордада іскерлік, медицина, өнеркәсіп, білім беру және гольф туризмі даму үстінде. Туристерге арналған цифрлық қызметтер, соның ішінде әуежайдағы Taxi Point, экскурсиялық маршруттар және гидтерді дайындау жүйесі енгізілді.
