23 маусым – Қазақстан полициясының төл мерекесі. Бұл мереке – заң мен тәртіптің, тыныштық пен қауіпсіздіктің қырағы күзетінде тұрған тәртіп сақшыларының еңбегіне, ерлігіне көрсетілген құрмет. Сондықтан мереке қарсаңында ерен ерлік көрсеткен, өз ісіне жауапкершілікпен қараған полицейлер марапаттарға ие болады.
Полицейлер азаматтарды түрлі қауіптен құтқару кезінде өз өміріне төнетін қатерге қарамай өртеніп жатқан ғимаратқа да кіреді, ұрлау-тонау, адам өлтіру сынды қылмыс кезінде де араша түседі, осылайша қиын сәтте дер кезінде көмек көрсетеді. Тәртіп сақшыларының сол еңбегінің арқасында 2024 жылы елордада кісі өлтіру, тонау, қарақшылық, ұрлық сияқты қылмыстардың тіркелуі азайды. Бұл үрдіс биыл да жалғасып жатыр. Елорда Полиция департаментінің бастығы, полиция генерал-майоры Марат Төлебаевтың айтуынша, жыл басынан бері 4 айда қалада қылмыс деңгейін 10% төмендетуге, тиісінше азаматтардың қауіпсіздігін қамтамасыз етуге, заманауи цифрлық шешімдерді белсенді пайдалануға бағытталған заңнамалық бастамаларды күшейту арқасында қол жеткізілді. Сондай-ақ қылмыстың алдын алуда кадрлық әлеуетті арттыру маңызды рөл атқарды. «Полиция қадамдық қолжетімділікте» қағидаты шеңберінде полицейлердің қоғамдық орындарда тұрақты болуының әсері қамтамасыз етіледі.
– Өткен жылы 6 учаскелік полиция пункті мен 3 стационарлық модульдік бекет пайдалануға берілді, жыл соңына дейін тағы 13 ПББ және 3 бекетті іске қосуды жоспарлап отырмыз. Цифрлық жобалар іске асуда, соның арқасында полиция қызметінің бірқатар бағыты бойынша жұмыстың тиімділігі артты. Сыртқы қызмет мамандары заманауи смартфон және планшетпен қамтамасыз етілген, – деді М.Төлебаев.
Сонымен қатар қалалық бейнекамералар желісі кеңейтілуде. Қазіргі уақытта елордада 200 мыңнан астам бейнекамера жұмыс істейді, оның ішінде Жедел басқару орталығына 36 мыңы шығарылды. Олардың көмегімен 3 мыңнан астам қылмыс ашылып, 27 мың әкімшілік құқық бұзушылық анықталды. Бұдан басқа, бейнеаналитика жүйесі – «Уәзір» аппараттық-бағдарламалық кешені пайдаланылады. Балалардың қауіпсіздігін қамтамасыз ету үшін ЖБО-да 7 мыңға жуық бейнекамера мен білім беру мекемелерінің 238 дабыл түймесі шығарылды. Сондай-ақ елордада азаматтардың өтінішін көп арналы қабылдау жобасы енгізілді. Бір жыл ішінде 8,5 мыңнан астам өтініш қабылданды, оның ішінде 139 бейнеқоңырау және 8513 мәтіндік хабарлама бар. Астана полициясының басшысы цифрлық технологиялардың қарқынды дамуын ескере отырып, аса маңызды міндеттердің біріне айналған киберқылмыспен күреске жеке тоқталды. Бұл мәселені шешу үшін елордалық ПД-да интернет-алаяқтықтарды ашу және анықтау әдісін жетілдіруге маманданған бейінді басқарма құрылды. Жүргізіліп жатқан ақпараттық-түсіндіру жұмысы интернет-алаяқтық жағдайының төмендеуіне әсер етті. Сондай-ақ Ұлттық банктің базасында заңсыз транзакцияларды анықтауға және жедел бұғаттауға мүмкіндік беретін Антифрод-орталықтың ашылуы интернет-алаяқтықтардың анықталуының артуына ықпал етті. Оған 60-тан астам ұйым, оның ішінде банктер, ірі төлем, микроқаржы ұйымдары және құқық қорғау органдары қосылған. Былтыр 161 адам және киберқылмыскерлердің 3 тобы ұсталды, 1350 интернет-ресурсты бұғаттауға жіберілді, 1116 адам бұғатталды.
– Қазір есірткі заттарын өткізу жаңа деңгейге көтерілді. Есірткі сатушылар интернет-ресурстар мен төлем жүйелері арқылы байланыссыз әдісті қолданады. 238 есірткі сайты бұғатталды. Өткен жылы барлығы 1116 есірткі құқық бұзушылық анықталды. 342 кг есірткі, оның ішінде 23 кг синтетика тәркіленді. 3 мыңға жуық есірткі граффити, оның ішінде қала тұрғындарының қатысуымен жойылды, – дейді департамент басшысы.
Ұсақ құқық бұзушылықтардың алдын алуға және «нөлдік төзімділік» қағидасын құруға қатысты Астана қаласы ПД деректері бойынша бір жыл ішінде 1,5 млн-нан астам әкімшілік құқық бұзушылық анықталды. Тұрмыстық зорлық-зомбылық мәселесінде өткен жылы 7 мың бұзақы-жанжалқор әкімшілік жауапкершілікке тартылған, бұл 2023 жылмен салыстырғанда 3 есе көп.
Жасөспірімдер қылмысының алдын алу үшін мектептерге басшылық, жедел уәкіл, учаскелік инспектор және ювеналды полиция жауапты болып бекітілді. Білім беру ұйымдарына бұзушылықтарды жою туралы 42 ұсыныс жолданды. Алғаш рет кәмелетке толмағандарды қорлағаны үшін әкімшілік жауапкершілік енгізілді. Жол қозғалысын бақылау кезінде 1,5 миллион әкімшілік құқық бұзушылық анықталды. «Қорғау» жүйесі жалған нөмірлері бар 70 жүргізушіні, 1157-сі жоқ және 340-ы құқығынан айырылған жүргізушілерді анықтады. Айыппұл тұрағына 1830 автокөлік қойылды, 22 мың жүргізушіге әкімшілік құқық бұзушылық бойынша берешек туралы хабарланды. Ekin Patrol интеллектуалды кешендерімен жабдықталған автопатрульдермен 56 мың жол қозғалысы ережелерін бұзу анықталды.
Райхан Рахметова
